上海小南國 (時代廣場) (已結業)

上海菜係我其中一樣至愛嘅菜式，不過坊間嘅上海菜飯店太多，並唔係每一間都好食。今次去時代廣場嘅小南國，我覺得算係有驚喜。最簡單嘅雞油炒豆苗，佢都炒得生熟程度剛剛好，保持到蔬菜嘅鮮嫩，又唔會太硬。我嘅至愛係蜜汁火方，小南國嘅蜜汁火方除咗火腿鹹香撲鼻之外，蜜汁仲加咗大量桂花，令到香氣更上一層樓。甜度適中，放喺貝殼形嘅包點裏邊，簡直相得益彰。仲有砂鍋雲吞雞，個雞我就一般好少食，但係個雲吞皮薄餡靚，雞湯味濃郁，飲完一碗即刻想再飲另一碗。仲有一個煮食係上海粗炒，味道都好好，講開都想返去再食。