坊間嘅寵物友善餐廳，大多數都係唔會focus喺食物質素，因為去嘅客人多數都醉翁之意不在酒，不過今次都有啲令我跌眼鏡 同朋友帶埋狗狗周圍搵地方食嘢，今次去到將軍澳，地點有啲隔涉，但係環境好靚，好多俾寵物嘅打卡位，仲有俾寵物玩嘅真雪場。 不過呢度openrice，我都係focus返食物 我哋點咗兩款食物，all day breakfast 大件夾抵食，百幾蚊已經有多款食物，仲要擺盤擺得好靚 另外一個菜式係安格斯漢堡，非常足料，漢堡扒唔似係現成來貨，唔知係咪自己整嘅，牛味香濃。薯條份量大，炸得外脆內軟。 呢度嘅食物質素不錯，不過最開心嘅真係隔離左右都係唔同嘅狗狗，我真係又有得食，又有得玩，開心到飛起

朋友喺荔枝角返工，就佢放工喺荔枝角食飯，我想食亞洲菜，朋友就帶咗我去食泰國菜 餐廳唔係好大，不過都幾光猛，有陣時好怕啲工廈餐廳黑麻麻，成日會形住唔乾淨，所以入到去夠光，感覺環境都清潔啲 坐低睇餐牌，老實講，我嚇咗一跳，2人餐$245?????? 唔係per head 喎 仲有一個2人餐貴少少，$358。咁第一次試就試個平啲嘅先啦，諗住$245嘅嘢，應該都唔會食得飽，如果啲嘢好食先再加其他嘢 第一個上嘅菜係串燒，我一睇，點解咁多肉嘅，一串嘅肉嘅份量係我平時食開嘅泰國餐廳嘅接近兩倍。食入口，呢個價錢當然唔expect係黑毛豬質素，但都有肉味，最正嘅係個沙嗲汁，佢嘅調味食得出唔係現成沙嗲汁開嘅，而係用好多唔同嘅香料調出嚟 跟住嘅柚子沙律就正常一啲，雖然冇咁驚為天人，但係同樣足料 泰式炒生菜，生菜係平嘢，本身真係冇咩期望，但係又係另一個意外，佢嘅調味真係令到普通嘅生菜一啲都唔普通，食完呢味菜之後，我終於confirm呢間嘢最出色嘅應該係調味 最後係泰菜裏面我嘅飛佛菜式生菜包，同樣都係份量足調味正，我真係冇諗過百幾蚊per head已經可以食到又好食又飽肚嘅泰菜 朋友雖然都已經飽咗，但係佢話呢度嘅椰皇甜品出名好食，但我咳緊醫生叫我唔好食甜，我就要留返下一次了，朋友就自己獨食 埋單嗰陣又出現另外一個意外，我食完返通常都會check一check單，睇單見到竟然唔駛加一，我忍唔住問waiter，你哋唔駛加一？侍應答返原來星期六日都要加嘅，不過平日就唔駛，我決定下次一定會嚟，不過都係會揀平日，嘻嘻

聽聞呢間啲煲仔腸粉好好食，特登走去食，有一次晏晝12點幾一點去到，然後話未去拎腸粉冇得食，所以我走咗。 跟住今日5:10去到，話煲仔腸粉淨係五點前先有， 5:00之後只可以叫$128嘅蟹粉煲仔腸粉，我問佢我肯俾$128但係我唔食得蟹粉有冇可以轉其他嘢，係冇囉，係咪要大枝嘢到咁樣。

朋友係香港仔地膽，嗰日出開香港仔，佢就話帶我去食好西，所幸，好西真係好西。 魚皮我平時唔係幾食，但係朋友話呢度嘅薑蔥魚皮喺必食之選，咁我就試吓啦，點知真係食到停唔到口，佢嘅魚皮一啲都唔腥，唔會滑潺潺。估你都估唔到，魚皮嘅質感竟然係爽脆。加埋薑蔥同甜豉油一齊食，我話俾大家聽我係打包左一份返屋企嘅。（不過返屋企之後味道真係有距離，所以都係堂食好） 金沙魷魚，個鹹蛋味非常之香，絕對唔係出邊嗰啲所謂金沙得少少鹹蛋就算。佢個鹹蛋仲唔知用咗咩方法令到佢係流沙嘅，coat咗喺炸魷魚嘅面度，就算熱氣都要繼續食。 另外掛住食唔記得影相嘅係乳鴿同埋沙薑雞腳。乳鴿都炸得香脆，不過我本身對乳鴿一般，但係我啲朋友都食到舔舔脷。沙薑雞腳非常入味，選腳趾都在所不惜。 其中一個招牌菜係蜜糖薯仔牛柳粒，呢個就相對頭兩個菜式較為失色，亦都同我食開嘅另一間小炒有距離。牛肉有啲銀，薯仔亦都唔脆。 豆腐海皇羹就好一般，生粉多咗啲，材料唔太夠。 本身朋友話呢度個石鍋芥蘭好好食，不過因為我唔太鍾意食芥蘭，而非常之鍾意食豆苗，就問店家可唔可以做石鍋豆苗，店家話可以。上菜嘅時候的確好香，但係豆苗都係適宜用蟹肉或者瑤柱扒多過石鍋，所以個味道唔係好夾。 最後就算已經好飽，但係都加咗個豉椒炒雙蚌米粉底。雙蚌冇咩特別，但係個精華係個米粉，煎到香香脆脆，再點埋啲豉椒汁，飽都要繼續食。 最後要一提嘅係，以上嘅食物係我哋三個女仔一餐之內叫嘅，雖然食淨少少打包左，但係都真係好誇張。（後記，我哋之後仲去咗食糖水）

因為係朋友訂位，所以我冇Menu，上菜嘅時候其實我係完全唔知咩嚟嘅，而家我都應該俾唔到名，但係唔緊要，我都照寫嘅原因係食過返尋味，基本上每日送我都覺得好好食同埋好特別 我哋嘅食飯係每位三百幾蚊，然後佢就會幫我哋寫菜，頭盤湯水主菜主食甜品樣樣都齊，呢個價錢呢個味道簡直超值。

有一班朋友，次次都鍾意周圍搵好西食，通常我哋都唔會特別問食咩，有人話呢間好，我哋就會去試。 今次朋友揀咗間私房菜，俾個budget佢，佢就會同我哋寫菜。基本上整體評價係所有菜式偏清淡，非常適合鍾意食清淡嘢嘅朋友，尤其是我哋本身有一個朋友對味精敏感，佢食完成餐都冇事，可見佢哋真係一啲味精都冇用。 以基本上所有菜式都睇得出花咗好多心思，甚至有部份係手工菜。 魚子醬椰香水晶蝦上枱嘅時候下面有乾冰，賣相一流。我當佢係頭盤，所以佢個椰青糕加埋烚蝦都真係幾清淡。 鮮松茸瑤柱燉花膠，湯都係鮮美清淡，而我聽返店家講，鮮松茸先從容係比平時我哋食開嗰啲乾松茸貴好多倍。 冰鎮南非活鮑魚口感非常特別，平時我哋食開嗰啲鮑魚，通常都係糖心煙靭，但係佢可以整到呢個鮑魚脆口，真係好得意。 雪花扒豆苗我識讀菜嘅鮮甜，我本身非常之鍾意食豆苗，不過最鍾意食嘅煮法都係扒蟹肉或者瑤柱，今次扒蛋白個感覺都幾新鮮。 翡翠骨香星斑球個游龍已經搶眼非常，啖啖肉煎得好香，配合其他配菜非常唔錯。然後個魚骨再攞去翻炸，非常香口。 龍游桂花，係傳統粵菜嘅炒桂花翅，呢個餸菜完全睇得到大廚嘅手工，因為想出嘅時候我真係以為係有粒粒桂花。平時喺出面食啲炒桂花翅，其實只係見到蛋絲，技巧都已經完全唔同。所以當我哋問大廚邊個菜式最難煮嘅時候，佢都話係呢個。 上湯手拆龍蝦烏冬，本身我已經食到好飽，諗住澱粉質可能都唔食，點知食咗一啖，然後我就密密食晒成兜。 鮮忌廉楊枝甘露唔似平時嘅楊枝甘露嘅味道，我最鍾意係佢嘅大西米，好有咬口。

朋友生日，佢住東區，就想搵間近近地嘅餐廳幫佢慶祝。東區好食嘅餐廳我認識嘅唔多，但係阿詩瑪壹菌絕對係其中一間我會推介嘅餐廳。 因為人少少可以叫嘅嘢食唔多，一個拼盤就可以包羅萬有。我哋叫咗個五福民族拼盤，包括白玉青瓜卷、宮廷醬茄子、燈影藕片、山珍腐皮卷、油雞樅蟹籽拌海蜇五個小食，每個味道完全唔同，完全冇重複，但係個個都精彩。 我最鍾意食嘅係燈影藕片，佢可以將蓮藕切到咁薄嘅薄片，再加埋醬汁糖漿，香脆可口。 主食係雲南野生菌鍋，我最鍾意食菇，呢個菌鍋完全吸收左雞湯嘅鮮味，除咗菇同雞食晒之外，個湯都係飲晒，最後飽到攬住個肚埋單。

因為疫情關係，去咗中國公幹嘅好友已經好耐冇見。疫情緩和，終於返香港見吓朋友仲要食返餐。呢排真係好多餐廳都係俾budget佢哋寫菜，今次都唔例外。呢餐真係好好味，性價比極高，超級滿意。 鹽燒南非鮑魚+魚子糖心蛋 椒鹽鮑魚外脆內軟，香口非常，加埋椒鹽個配搭真係好正。我個人本身唔鍾意食魚子，覺得佢有啲腥，但係個糖心蛋就好好味。 萬壽果燉響螺汽鍋湯 食得出佢嘅滋潤，最令人難以置信嘅係燉完個湯，佢嘅雞同埋響螺等等全部都仍然可以食，唔會好鞋。 西芹彩椒雲耳炒星班球 星班煎得香口，啖啖肉， 正。 蟲草花蒸星班件件 一班兩食，兩種完全唔同嘅風味但係都好食。蒸班件一樣啖啖肉，冇咗香口嘅感覺更加食得出個魚味，同蟲草花好夾。 中總炸子雞 伴 印尼蝦片 蝦片食得出係鮮炸，雞件炸得好香而不油。 金銀蛋浸菠菜 菠菜鮮嫩，配合金銀蛋咸而不膩。 中華軒砂鍋炒飯 香港人鍾意食粒粒乾身嘅炒飯，呢個炒飯絕對係符合標準。可惜唔啱我，我比較鍾意台式炒飯，粒粒晶瑩軟滑但係唔會太乾。所以呢個港式標準炒飯我就一般。 薑汁撞奶 最怕用薑整嘅甜品冇薑味，而家喺出面食甜品，好多時薑湯，薑水等等嗰啲全部都唔落足料去煲。呢個薑汁撞奶，絕對落足材料，薑味糖夠辣，同奶味混成一體，係成餐飯嘅畫龍點睛

朋友介紹之下，去食段純貞。我本身想叫佢個雞湯麵，但係佢話要15至20分鐘先有得食，我比較趕時間，所以就叫返個普通牛肉麵，而我選擇嘅係手工面。 牛肉非常之淋，並且入味，手工麵彈牙有咬口，非常之好味。 紅油抄手係朋友極力推介，但係反而有啲失望，抄手只係一半蝦肉雲吞，我唔係特別鍾意，因為我鍾意菜肉雲吞多啲。個辣味亦都唔算入味，芽菜更係冇乜味，下次嚟會再叫其他小食試吓。

每次去親觀塘，其中一間會心思思想去嘅餐廳就係京饌。咁遲收工喺附近，所以就去咗食。 平日我主打嘅菜式係菜肉雲吞同埋嫩雞煨麵，今日同埋朋友一齊食，所以可以叫多兩樣，我哋就揀咗桂花糖蓮藕同埋上海粗炒。 桂花糖蓮藕我本身以為係就咁蓮藕加桂花糖，點知原來佢係會將每一嚿蓮藕都炸過先再加桂花糖漿，揸得非常香口，加埋桂花糖漿真係好好食。不過本身我唔食得太多炸嘢，如果唔係清碟都得。 菜肉雲吞一如以往水準，皮薄餡靚。我鍾意嘅菜肉雲吞菜肉比例係菜多個肉好多，而佢亦都完全符合我嘅要求。清湯亦都唔錯，如果唔係我要飲晒嫩雞煨麵嘅雞湯，我都會飲咗呢個湯。 嫩雞煨麵亦都係符合水準之作，雞湯濃郁，杯麵會得夠入味，絕對唔係出面好多地方嘅湯還湯麵還麵。 上海粗炒都好味，水準正常，未至於好多年嘅會面同埋菜肉雲吞咁好，但係都係合乎水準。