Fûhn (The L. Square) (已結業)

老公一聽到食越南菜就會眉飛色舞，今日就同佢一齊攞半日假拍吓拖去到銅鑼灣Fûhn。入面環境相當寬敞，嚟到過咗平日午飯時間，所以比較寧靜，我哋可以食個悠閒嘅下午茶。好多時食越南菜，大家都會研究點食牛肉粉先係最正宗，而呢度就有教你step by step咁食，跟足次序最有風味。是拉差同魚露就係越南粉嘅精髓，而呢度全部都齊備。嚟到當然要叫個火車牛魔粉，除咗有生牛肉，仲有牛腩同牛柏葉，可惜就獨欠牛丸。湯底睇落清澈但飲落味濃，配合九層塔同是拉差，絕對有水準。另外仲叫咗蕃茄牛坑腩配法包。蕃茄汁味道濃郁，牛腩呈半肥瘦，而且份量相當多。蒜蓉包上面有粒粒蒜蓉，夠晒香口。越南啤酒飲得多，但原來配合鹹檸又幾過癮。牛油果奶昔夠香滑，而且又唔太甜，非常好味。