麵麵 (已結業)

今日收工過開旺角，突然間好想食魚麵，於是又翻返嚟呢間麵麵度，好彩早人哋一步行樓梯上嚟，如果唔係等得𨋢嚟嘅話都要排長龍。我自己就嗌左個避風塘雞翼濃湯魚麵，佢嘅避風塘雞翼唔辣，雞翼都炸到外皮脆卜卜，入邊嘅雞肉就好嫩滑好Juicy。不過最正嘅都係佢個魚麵，每一啖都超彈牙，但係又一啲都唔腥，加埋佢個魚湯，冇腥味之餘又好清甜。男朋友就試咗佢個麵麵圍城，因為佢有九樣小食圍住個魚烏冬。魚烏冬比起魚麵來講冇咁彈牙，但係口感會比較煙韌一啲，食落好似飽肚啲。而佢九樣小食入邊我最印象深刻嘅係佢個明太子雞翼，雞翼入邊包住滿滿嘅明太子，好夠味。另外仲有個醉蝦，不過佢個蝦就冇酒味嘅，啲蝦食落都好爽口彈牙。小食我哋叫咗漁人樂脆，入邊有普通薯條、番薯條，最重點係佢地嘅自家制墨魚條同魚肉條。兩種魚條嘅外層都係腐皮包住，炸到脆卜卜，啱晒啲鍾意食香口嘢嘅人。但係我自己就比較鍾意食番薯條，外面脆卜卜，入邊軟得嚟甜甜地，唔錯。而嘢飲方面我就試咗佢個泡沫玫瑰奶茶，佢係利用玫瑰蜜糖你做到呢個效果。玫瑰味好出，但係茶味就比較淡少少。而鍾意飲咖啡嘅男朋友就試咗佢哋嘅斑斕咖啡，同樣地都係用咗斑斕糖漿，所以糖漿嘅味道比較濃。