MOO MOO Plus (百德新街) (已結業)

住觀塘嘅我哋，仲有一個地方成日會去，就係銅鑼灣喇！銅鑼灣百德新街唔單止環境好，仲有好多好嘢食，呢間 Moo Moo Plus，我哋經過幾次都好想入去試，因為覺得好Chill，後來我哋試咗觀塘嘅Moo Moo覺得好驚喜之後，就立定決心要試埋呢間。銅鑼堡 HK$148除咗鍾意食漢堡，仲好鍾意食鵝肝，呢兩樣加埋一齊，未食都知會好香。佢嘅漢堡一如既往保持水準，由於太厚，一定要用刀切嚟食。鵝肝處理得相當好，唔羶而且外脆內軟，外皮少少燶多多脆，份量大大舊。Moo Moo汁係成個漢堡嘅靈魂，嗰陣大大嘅生蒜香味，好啱我呢個蒜頭控。平鐵牛排 HK$180 牛排處理得好好，睇得出係好靚嘅部位，食入口嫰滑又多肉汁，一啲嚡口感覺都冇。最欣賞係個焗蒜頭，嘩！好少地方有得食喇依家，而且佢焗嘅時間啱啱好，完全帶出蒜頭嘅香甜。 炸洋蔥 HK$58 香口夠多汁，一個字：正！PS 呢度嘅環境真係好好，坐得舒服，望出去個View又靚，好啱周末Chill一番。