德國廚房

營業中

休息中

難得今日在大埔開工，仲可以準時鬆人，同事即刻話帶我去威威，要去Happy Hour一下，我話乜唔係d酒吧收晒皮咩？佢話啤一啤唔一定係去酒吧嘅，佢話大埔有間德國餐廳，d德國啤酒好好飲，於是我當然係二仔底：死跟啦。呢間餐廳唔係好大，目測5至6張枱左右，不過入到去真係好surprise，因為黃昏6點呢d時間竟然已經有兩枱客喺度食(我開頭仲以為我地可以包場架)。由於跟住要返屋企食飯，所以齋飲無叫野食，我同事叫咗一支西柚啤，而我就試咗支無酒精啤酒，我仲問老闆娘無酒精都可以叫做啤酒咩？佢話香港法例話酒精含量少過0.5%就可以叫做0酒精，講真，入口真係好似淡口嘅啤酒，好淡好淡嗰隻，味道近似台灣金牌啤，真係呃得下人，下次有人隊我我一於飲呢隻，佢個名叫Bitburger Drive 0.0%。至於我同事嘅西柚啤我都飲咗一啖，少少酸，好清新好爽，好似今日咁熱嘅天氣就真係啱晒，我同事飲晒成支，完全無醉意，原來西柚啤嘅酒精度只有2.5%，比一般啤酒低差唔多一半，所以最後我哋兩條友話就話Happy Hour，但係就全無醉意咁離開。題外話，我見隔離枱隻豬手都好似好正，下次一定再黎試埋。