霸嗎拉麵 (屯門市廣場1期)

營業中

休息中

霸嗎拉麵幾年前登陸香港既時候大受歡迎，一直我都好想去試，可惜次次經過都遇正繁忙時間，大排長龍。今次難得閒日經過，又過左午餐時間，終於可以同朋友一嘗啦。淨係門口既風格已經好吸引，深木色餐枱椅配紅燈籠，充滿日本風。有吧枱位置，可以睇住師父製作拉麵。同日本拉麵店一樣，提供凍水俾食客。醬油碟都好貼心，最面有隻碟包住唔用既，貼左提示食客拎下面果d用，確保衛生。下午時段有跟餐優惠，好抵食。醬燘雞叉燒拉麵，湯底濃厚鮮甜，雞叉燒大大件，份量十足，雖然係厚切，但肉質柔軟，仲要索晒湯汁既味道，木耳絲夠爽，拉麵係幼麵條，麵質我揀左中度，唔硬又唔軟剛剛好。濃厚豬骨豚肉玉子拉麵，豚肉肥瘦適中，近乎入口即溶，非常有水準，湯底比雞叉燒拉麵更濃厚，荀唔乾身又冇渣，糖心蛋蛋味香濃，夠入味，唔覺唔覺竟然可以食得晒。唐揚炸雞，炸得夠乾身，有肉汁。羽根燒餃子，d網紋脆脆勁香脆，入口chop chop聲，餃子底部煎得夠香脆，面頭仲保持到水份，上軟下脆，好特別。今餐既份量其實三個女仔食都夠，呢個價錢食到咁有風味既日本拉麵，下次會再來。