Le Viet

今日帶阿仔攞完身分證，就喺尖沙咀周圍行吓街，順便搵個地方食餐晏，就嚟到TheOne，最後揀咗呢間Le Viet。原來呢度平日嘅午市都幾抵食，午市套餐由$65起，就已經包埋飲品，所以平日中午都不乏捧場客。另外主餐牌有更多選擇，我哋一行三人，但阿仔又食得唔多，所以就決定叫兩個午餐再加一啲小食。首先當然係叫返個大人細路都鍾意嘅炸蝦餅，總共有完整四件，蝦餅肉質都夠彈牙，炸得夠乾身，食起上嚟冇油膩嘅感覺。牛油雞翼就更加抵食，總共有五隻而且size都幾大，每啖都充滿牛油香味，再加上上面灑滿蒜蓉，真係非常惹味。午餐方面就揀咗大蝦菠蘿炒飯，上面有三隻大蝦，蝦身已經去殼，仲有啲豬肉鬆，而炒飯裏面就有菠蘿、火腿、三色豆等配菜，啱晒小朋友食。海鮮炒檬粉有原隻嘅蝦、小八爪魚、蜆肉，仲有炒蛋，檬粉炒得乾身，主要以胡椒粉作調味，清清地都唔錯。跟餐飲品叫咗一杯凍檸茶同埋加$8轉紅豆冰，紅豆冰唔太甜，如果有多啲紅豆就更加正喇！