炸老闆 (已結業)

今日下午係旺角上堂, 正值午飯時間, 但我又唔太肚餓, 所以打算買少少輕食番課室食就岩岩好啦。其實我係太子站B1出口附近既幾條街都行左一圈, 餐廳係幾多既, 不過無乜邊間特別吸引到我, 唯獨係呢間細細地既鋪頭最特別。大大隻字寫住台式蔥油餅, 即刻令我諗起之前係台灣夜市掃街既感覺!鮪魚玉米蔥油餅 ($34)一共有8款套餐, 因為我中意食粟米我就揀左呢個鮪魚玉米蔥油餅。拎上手既時候雖然隔左個紙袋, 但都仲好熱, 所以要等一陣先放到落口。個外皮炸得好酥脆, 一咬落去會有好多細碎飛哂出黎, 同時我覺得有點油膩。最誇張係中間既流心蛋, 我咬開左少少, 一個唔流神用力少少, 黃色的蛋漿就流哂黎, 食到我成手都係, 仲滴埋落條褲度… 有少少狼狽, 好彩有帶紙巾, 如果唔係都唔知點算。另外因為我拎到番課室先食, 所以中間既吞拿魚同粟米都sir哂落底, 最後食哂個蔥油餅, 仲有好多餡留左係袋底。古早味冬瓜茶味道幾好, 綠茶加左冬瓜糖去調味, 唔會太甜。食熱辣辣的蔥油餅, 配呢個涼涼地既冬瓜茶, 唔錯。