殿糖級 (已結業)

咁耐冇約朋友食野，好似冇晒朋友咁...今日終於忍唔住，同朋出左街食飯，呢段時間有太多野要分享，飯後再食埋甜品...咁先係真正嘅生活。我叫左個楊支甘露，好足料，椰汁唔係太甜，岩晒我地想食甜品但係又怕肥既人😝，食完都唔會太有罪惡感。朋友叫左個心太軟配雪糕，如果一個人食都幾飽...即叫即整，等左十幾分鐘，一切開果然有流出朱古力漿，雖然唔係新野，但好好味另外店內好d暗，岩晒傾計，講耐d都唔怕，店員又冇催我地走，不過廁所就真係太細。

好難食，差左勁多，椰汁又冇椰汁味，成pat野🙄️啲水果又吾好食，比以前差左好多，好似hea住做咁食左一啖已經吾想食了🙄️🙄️🙄️🙄️🙄️🙄️！！！

第一樣嘢就叫心太軟.. 點個一嚟到 乾過江蘇餅.. 諗住叫佢換取消左佢算.. 個伙記話唔俾取消 焗我地要再整過... 整過個新嘅嚟又用隻鼓油碟裝住咁 又唔換埋個雪糕 舊果舊雪糕都熔哂.. 最終分開哂兩碟 食兩啖都無心機再食 無誠意到一個點 無下次!!

今晚早食飯，食完後七點多去食甜品，叫左三個心太軟，等左十數分鐘第一個來睇落唔錯，啲朱古力漿係咁流出黎，但再等多兩分鐘出果第二三個簡直唔可以叫心太軟，切落去無漿之餘差唔多變蛋糕咁，有無搞錯，推介係心太軟但做得咁差，只有三分之一成功率？！向職員投訴後雖然話整過一個俾我地，但整三個得一個得的情況下，我地仲邊有信心俾你浪費多十幾分鐘。仲點可以再食！雖然殿糖級係連鎖店，但今晚的職員似家庭式經營咁，完全唔覺識整甜品。除了心太軟唔得外，餐牌中有啲野無再提供又唔改或遮住佢，個榴連班㦸味道雖可以，但榴連個色成個芋頭咁既色，食左都唔安心。

有次收工同一大班fd去食pp試過真係翻五到轉頭！！我點左個牛奶沙冰，一食d奶味好好好濃^_^好有細個食白免糖既味，yummy yummy!! 仲有個心太軟，因為係即叫即整，所以等耐少少，到個心太軟黎到就好香，入口即溶！！個朱古力不太甜，偏苦，岩哂我口味，而且價錢ok，份量又大，認真抵食！！！我地12點幾去食，d staff依然好好招乎，👍like 呀！環境乾淨又冇乜人，適合大班人，情侶去食！期待下次再去幫襯

殿糖級都算幾多分店的品牌，不過每間賣既野好似有d不同，有d只做外賣，原來有即焗既甜品只有4間，太遠嗰d,就去唔到喇！近近地大圍就有一間，係旺角搭火車兩個站就到。店內燈光有點暗，不過唔緊要，今次同個朋友傾下計咁既燈光岩岩好，我地點左個芒果拿破崙同一個心太軟，等既時間都有d耐，都唔緊要，因為即叫即整，都值得既，而且呢兩款甜品都唔係通街食得到。首先黎既係芒果拿破崙，酥皮夠脆，甜度也適中，夾埋中間既漿黎食好好味。再黎等左我地成20分鐘既心太軟，終於到喇！一切開好多朱古力漿流出黎，甜度不會太高，加上朱古力既香濃...夾埋個雲尼拿雪糕一齊放入口食，真係想即刻食多個😍（不過太飽喇，留番下次再食）美中不足既係....顧住傾計冇影到相下次一定要影番！

以前找甜品吃曾經過此店但見沒有人，沒進。今晚見有兩枱客人便入內試試。我們都喜歡吃榴連，叫了一份D24榴連糯米糍，及每人一碗紅棗雪耳燉海底椰。糯米糍：可以用難吃來形容，沒什麼榴連味，質感也很奇怪。海底椰：味道是可以的，只是材料少得可憐！見很多檯都吃雪花冰，或許不應該在這吃中式甜品。

吃完晚飯散步行到大圍想吃糖水。選了殿糖级，坐位雖然多，但仍有很多客在外等。所以更要試下。榴槤玉露，超香榴槤味略帶甜，啖啖都有榴槤肉。魔鬼冰，朱古力味綿綿冰加上爆珠和脆米，每啖都很冰凉好消暑芒果西瓜蜜瓜黑真珠撈，水果新鮮黑真珠透心涼。

食飽飯硬係想食下d 甜品既😂食甜品係第二個胃黎架嘛，黎到殿糖級食！第一次黎就試下佢既心太軟啦！等左around15minute la, 都唔算係等得耐既，但真心係好！好！食！呀！d 朱古力流心，"吉"落去仲熱辣辣咁，再配埋ice cream 咁食，一凍一熱既感覺好正，下次再黎我都會再點呢個黎食！一試難忘。🤡💁‍♀️朋友就點左焦糖布甸，都唔錯呀，好滑好好食。位置又唔算好遠既，mtr 行過去唔使10minute. 推介！！！！！

同朋友係大圍食完野，未係好飽，所以就去搵甜品～ 我俾個名: 殿堂級吸引！好多人等入去，我哋都算快有位坐～ 一坐低，見到menu好厚。由一般甜品店有嘅甜品通通有齊。比較特別係魔鬼球。我就叫咗心太軟！要等10-15分鐘～ worth the wait!!! 睇下...初初仲諗個碟做咩咁大，原來流心真係好多～ 心太軟夠熱又夠脆💕 加埋朱古力雪糕（係石板街～有marshmellow😍好驚喜呀），一凍一熱，好match! 真係好流足～💗💗💗

眾所周知大圍好多好野食，今日食完飯幾個fd行過呢間甜品舖，就比佢好吸引既食物相吸引左入去。去到就叫左個呢個brand 最出名既魔鬼球，職員好細心知道我要錄片，所以等我準備好再淋朱古力醬😊外層係朱古力脆脆，入面就有啲朱古力慕絲、雪糕同埋消化餅餅碎，完全襯托度濃郁既朱古力味。雪糕有雲呢拿、朱古力同埋芒果，我揀左朱古力，竟然係石板街💛💛可惜既係所有野加埋略有啲太甜，同埋建議大家下次可以考慮叫雲呢拿，可以中和一下啲味道😋

都幫襯左幾次了，最鍾意呢間嘅Oreo 木糠，我覺得幾好味，都有試過窩夫、都岩我口味，覺得唔錯，有時放工都同約同事朋友黎食、鍾意食西式嘅都可以試下不錯喔，食完都會有種想自己整木糠，都幾簡單啊

外賣自取左碗 川貝蓮子百合雪烚膏番去，響外面等既期間，外面有 4位客人等緊位，一路聽到其中1位講：我地一路企響外面吹風，又冇人出黎問我地幾位，果個人又黑口黑面，好似唔想撈咁......下刪幾百字確實，比起岩岩開業，佢地既服務態度真係冇以前咁好，可以話係冇服務。到我拎左個糖水番去打開黎食，哇，真係好一碗糖水，我冇期望過會有好多雪烚膏，但係都未至於碗野會少料到咁既程度，3粒蓮子，2粒紅棗，幾片碎既百合，再加碎既雪烚，52蚊抵唔抵食就真係見人見智，但我相信我俾多10蚊食佢個原個椰皇燉3.6牛乳加燕窩，都應該會抵過食雪烚膏。不過經過今次，我係唔會再幫襯，我情願去斜對面食囉。做生意要賺錢好正常，但都要賺得有良心，對得起食客。再一次印證相片同事實終歸係兩回事！

聖誕節諗住晚飯后食下甜品，眼見門口企咁多人，吾衰得去边，掂之，落完單后，等......到左右隔離都俾我遅落單，人家都差不多吃完，再催下服務員，隨後服務員就送上放涼的合桃露，明明落單是熱的，唉....等左咁耐都算，另外朋友落單合桃露加湯圓沒有到，服務員說要落單才做所以要等下，終於到了，原來都是涼的合桃露加湯圓，呢D甜品及服務差到極點，埋單總要俾埋服務費，勸各位選呢食甜品，慎入。

甜品有好多款式好多品種，但不論係邊種甜品，總會有捧場客，甜品店亦開到成行成市，不論邊一區都總會搵得到而今次我同男友就去咗大圍嘅殿糖級殿糖級以西式甜品為主，亦有傳統中式糖水鋪仔細細，但甜品款式十分豐富，揭開MENU時，真係花多眼亂，選擇困難症又要發作啦！最終決定要燕窩椰皇燉3.6牛奶原個開頂椰皇上枱，面頭鋪滿燕窩絲，份量十足無欺場！3.6牛奶無想像中及印象中咁甜，但仍然有奶香，每一匙都盡量裝到所有食材，滑溜嘅燉奶搭埋椰皇裡面嘅椰青水一齊食，清甜香滑﹔再加上燕窩嘅微爽質地，材料整體配搭得宜，味道清甜，滋潤嘅甜品，啱晒秋冬乾燥時節食用！不得不提，椰皇好厚肉，邊刮邊食好滿足~唔好睇椰皇細細，食埋椰子肉，都好飽肚喺附近返工返學、飯聚、居住、踩完單車嘅朋友，又多一個食甜品嘅GOOD GOOD聚腳地