營業時間
今日營業
10:30 - 22:00
星期一至日
10:30 - 22:00
以上資料只供參考, 請與餐廳確認詳情
食家推介
1093 瀏覽
XO仔生病多天後終於病癒，蕃薯uncle即相約一訪業績疫市上升嘅「壽司郎」，見識吓人地點解咁成功。週五傍晚時份，連鎖店門外已擠滿食客候座，心急嘅長輩一收到細佬收工嘅訊息，即撳飛仔排隊攞位。圍繞住傳餸帶嘅卡位闊落舒適，又夠私人空間，桌上嘅電子餐牌簡單易明，落單亦十分快捷。綠茶自己沖。餐具及調味全部自助式，唯一要由服務生真人送上嘅就係酒酒。菊正宗清酒$17/壺，依個價位如果唔係上頭牌就一定抵，嘻嘻，每人點一壺，最均真冇得呃。食物話咁快就到。特選大吞拿魚腩壽司（$27）：蕃薯uncle早就探咗路大拖羅壽司係成個餐牌最值得點嘅一味，所以埋位一野就叫咗四碟！正當小肥覺得此舉有啲狼時，方才發現後面張枱點咗十碟，原來uncle算保守喎！大拖羅壽司鮮美香濃，肥潤不膩口，確真為成餐飯最美味嘅一款，結果食到尾都繼續追加，用行動表示支持！醬烤特選大吞拿魚腩壽司（$27）：由於拖羅被燒至熟透，反而變得成口油，食落仲帶少少腥，甚為失色。特選中吞拿魚腩壽司（$17）：有比較下，白碟嘅中拖羅當真不及黑碟嘅大拖羅鮮香肥美，依啲咪就係大肥爸爸常掛於口邊嘅「最怕貨比貨」囉！秋刀魚壽司（$17）：意外地，節令嘅秋刀魚質感軟腍，毫不爽彈，比預期相差好遠。大切油甘魚腩配鮟鱇魚肝（$22）：厚厚嘅油甘魚肉厚爽潤，頂面嘅鮟鱇魚肝恰好加添鮮濃惹味。三文魚腩壽司（$12）：薄薄嘅三文魚腩嘅味道同其色澤一樣偏淡，不吃也吧！炙燒三文魚腹壽司（$12）：輕輕燒過嘅三文魚腹壽司只係多咗一陣煙燻味，完全冇油香或魚鮮味，一樣唔係咁掂。壽喜燒牛排壽司（$12）：壽喜燒牛肉尚算薄身，敗筆在於牛肉煮得過熟，肉質乾硬老嚡，試唔過。香蔥赤蝦壽司（$12）：中等身材嘅赤蝦爽脆彈牙，香蔥成功吊出蝦隻嘅鮮味，唯一扣分在香蔥帶有一陣千年油味。醬烤鰈魚鰭邊壽司（$12）：鰈魚鰭邊油潤幼嫩，即溶喺口，屬白碟菜式之冠。炸蝦天婦羅拼盤（$27）：熱辣辣嘅炸蝦天婦羅都算好爽脆，以$27黎講真係冇乜野好挑剔。蜆肉麵豉湯（$27）：老人家話要有啖暖湯落肚先舒服，不過聽得出佢嗰句「OK啦」明顯暗示$27用黎食多件大拖羅壽司好過囉，哈哈！限定嘅六十分鐘話咁快就過！二人合共消化咗二十六碟壽司、小食及四瓶日本清酒，即平均每兩分鐘一款，講真食得好急，建議餐廳考慮延長用餐時間至九十分鐘，好等客人唔洗食得咁趕。「壽司郎」上環分店光猛企理，電子點單相當簡便，廚房效率都幾高，壽司中最正必選「特選大吞拿魚腩壽司」！雖則話最貴嗰碟都係$27，一個鐘頭沖得太狼結果埋單每人三百幾近四百，相信揀喺下午茶或者係歡樂時光幫襯可以佗佗佻佻地邊飲邊食應更為化算。
繼續閱讀
上環呢間壽司郎lunch time好多人排隊，一過咗lunch time就少咗好多人，今日1:45pm拎飛，差不多等到2pm就可以入去，剛剛好下午茶時間。壽司郎而家有下午茶套餐（只限平日2pm-5pm），超抵食。只需$40 ，就享用到壽司盛盒（炙燒壽司盛盒、赤身壽司盛盒或炸蝦天婦羅拼盤）+ 麵類（拉麵或烏冬）。我點了赤身壽司盛盒配烏冬，壽司有三文魚、赤蝦、玉子和吞拿魚。壽司新鮮，烏冬彈牙而且份量又唔會太少。
繼續閱讀
去上要觀音廟借庫，咪順路去埋壽司郎，睇吓有乜新嘢。春天的春祭。先黎個湯暖暖個胃，有驚喜，好多魚肉但得2個蜆，海鮮味重咗D。燒明太子吞拿魚壽司，幾好味，但明太子好小囉。鰹魚蘿蔔蓉沙律壽司，好好味，又比佢夾到。漬物，個烏賊鰭好韌，個吞拿魚腩，一股。焦糖芝士蛋糕就一般咁啦。食多幾件，燒蛋，腐皮，三文魚，八爪魚咁囉。滿足了。不過真係食飯時間超多人叫外賣同等位，好彩多梳化可以坐。個廁所有啲迷宮咁先搵到，哈哈。
繼續閱讀
歡迎follow IG @eatwifme2k24 睇更多❣️𝟑𝟎/𝟏𝟐/𝟐𝟎𝟐𝟑今日食壽司郎 ❣︎不過主角唔係壽司⋯⋯係甜品！一齊睇睇新出嘅甜品啦！🍮✂︎-----㋖㋷㋣㋷線-----✂︎1️⃣ 甘味温紅薯紅薯薯蓉用唧花咀唧成可愛嘅花紋表面燒炙至微焦，配埋忌廉一齊食香軟甜蜜嘅滋味好幸福！🤎🍠凍冰冰嘅天氣就係要整一啖暖笠笠嘅紅薯！2️⃣ 純白戚風蛋糕配特製忌廉呢個戚風蛋糕太鬆軟了吧！🤍相片雖然唔明顯，但除咗特製忌廉外，仲有一球忌廉芝士雪糕，微鹹又creamy配埋甜甜嘅忌廉同鬆軟嘅戚風蛋糕非常治癒！😍🤍🍨3️⃣ 威士忌梳打呢個雖然唔係新品，但係都值得講吓因為實在太伏⋯⋯好難飲！冇咩事唔好輕易嘗試😖4️⃣ 卡達拉娜呢個唔使多講🩷必嗌！✂︎-----㋖㋷㋣㋷線-----✂︎📍 壽司郎 (上環無限極廣場)💵 人均 ~$150
繼續閱讀
今次嚟到壽司郎食飯， 估唔到有機會食佢嘅烏冬，其實每一次嚟 都食得好開心，因為價錢平可以是好多唔同嘅壽司，而且壽司郎每個月都會有唔同嘅主題同埋新品，可以keep住每日都咁多人係咁咪幫襯真係有佢嘅原因。而其實每次就算一個人都食咗百幾$200嘅嘢食， 但就真係食得幾過癮嘅。今次試咗個之前未食過嘅貝類，已經唔記得叫咩名啊，但係都幾好食，估唔到食咗咁耐刺身都有啲嘢係未食過嘅，都算幾新鮮。而且今日都唔係好多人等位，等咗一陣就排到，相當值得嚟到食飯呀。有時簡單一個烏冬打底再食啲壽司過下口癮，又有何不可😆
繼續閱讀