中興美食

營業中

休息中

夜晚經過太安樓就會心思思想去幫襯呢間即叫即炒的炒粉麵外賣檔，河粉、腸粉，油麵、烏冬及公仔麵等任居君選擇，配料就有火腿絲、肉片、蟹柳絲、芽菜、韭黃、獅子狗魚蛋片、蝦餅條絲、紅腸絲、煎蛋等。今次我粉麵就就揀咗炒腸粉，配料就因為懶惰所以叫咗雜錦就算數。即叫即炒嘅腸粉，15分鐘拎到返屋企仲係熱嘅，炒得好有鑊氣，而且夠晒平，真係好掂。

哇喂，中興美食嘅炒粉簡直正到爆！呢次我揀了炒腸粉，蝦米腸粉滑唔溜手，炒得啱啱好，鑊氣十足，香氣撲鼻，啖啖都係驚喜。每條腸粉攬住醬汁，口感正到不得了，拖累我唔自覺咁一條條夾住食，根本停唔到口！加埋熱辣辣嘅鮮摑牛肉🥩，咬落去香滑得無得輸，真係食完仲想再食。成份新鮮夠哂水準，真係可以話係平民價錢食到嘅米芝蓮級享受。店員仲好熱情，推介我另加煎蛋黃🍳，話係經典搭配，唔加就話唔過去。講真，嗰粒半熟嘅荷包蛋配埋香辣嘅腸粉，簡直係完美至極！再講，聞到陣陣炒菜香，喺呢夜瞓前嚟點雜錦炒腸粉，仲開心過食鴛鴦火鍋呀！無論點，我覺得西灣河太安樓，絕對係掃街嗰陣，過癮炒粉嘅唔二之選👌。

終於試到傳說中的西灣河太安樓即叫即炒粉麵，本來就諗住叫炒油麵，但係叫嘅時候見到腸粉，於是改變主意叫咗炒腸粉。叫咗之後可以行一陣再返轉頭攞， 33係我嘅外賣號碼，不過少S同埋一劃就唔知代表乜嘢。呢份就係我叫嘅炒腸粉真身，配料就乜都要，入面有紅腸絲火腿絲韭菜芽菜獅子狗魚蛋蟹柳等，由炒好到開始食大概隔咗30分鐘，不過仍然有熱力，都幾夠鑊氣，不過就濕咗少少，如果炒得乾身啲應該會更加好食，不過已$28嘅價錢絕對收貨有餘， 都真係幾好食。

太安樓名物頭5位一定有中興份，唔好睇少佢D炒麵炒河炒腸粉，夠鑊氣而且平靚正。炒腸粉係我至愛，餸就揀雜錦，入面有火腿絲、迷你獅子狗魚蛋、蟹柳絲、蝦卷絲等，落單時建議叫佢幫你炒燶D，同埋要走芽菜(呢個係個阿姐教我嘅，佢話芽菜會出水所以會另到D腸粉炒得唔夠乾身)，因為D膠粉比一般D粉麵厚身，所以炒燶D一黎會香D，二黎因為炒嘅時間長咗所以會更加入味。另一份我就揀咗炒油麵，餸都係叫雜錦因為費事煩，呢個唔洗走芽菜亦唔洗叫佢炒燶D都已經好好食。

🇭🇰中興美食·雜錦炒腸粉$34呢個我之前一路都冇食過 係我朋友見到有人推介話呢間好有鑊氣 所以我哋專登買黎食😎佢呢度有好多麵底揀嘅 我地第一次就揀左烏冬 烏冬我自己覺得無咩特別 純水係幾大份 有啲蒜蓉幾惹味咁🧄反而我哋第二次買既炒腸粉 我自己就覺得幾好味 佢個腸粉真係炒到好有鑊氣 啲腸粉有少少焦焦地咁樣好正🔥·📍西灣河筲箕灣道57- 87號太安樓商場G12C2號舖·#rbyeat#rby西灣河#rby港式

今晚太安樓搵食臨走嘅時候見到呢間炒粉炒麵檔口仔香氣撲鼻又見到有少少人龍似乎應該係好野，唔想走寶嘅我梗係要排埋一份趁吓墟啦，佢d粉麵都有好多選擇，包括有油麵河粉米粉等，而我就叫咗炒腸粉，d餸就因為唔知揀咩野好於是就揀咗份雜錦，入面有火腿絲蟹柳絲牛肉雞絲獅子狗魚蛋等。即叫即炒煙霧離漫香噴噴手，佢會問我要唔要辣椒蒜蓉因為我唔識所以就淨係要咗蒜蓉。呢度剩係得外賣店主好細心喺個發泡膠盒面整穿一個窿等佢可以散吓氣，唔使返到屋企成盒都係倒汗水，味道唔錯，夠鑊氣，腸粉炒到微燶，盛惠$34 ，高水準低價錢。

本身行過都唔見依間舖頭有開，再行番轉頭就見有好多人等緊，難得山長水遠嚟到太安樓梗係要試下。見個叔叔用大鑊炒，一個接一個咁炒冇休息時間，真係睇見都覺得辛苦🙈🙈揀完粉麵之後就會執配料，配料有好多款，魚蛋、蟹柳，火腿，芽菜，雞柳及紅腸，如果冇要求就會每款配料執少少，亦都可以另外加錢要其他配料(蛋、漢堡扒)，執完之後就連埋個粉麵一份份咁排好等落鑊炒😬😬😬隔左一陣先食都仲係熱辣辣，出緊煙，用醬油調味再加少少辣嘅炒銀針粉鑊氣十足。兩個人share一盒食啱啱好😋😋

年初三(也是西方情人節) 晚上經過太安樓，第三次去"中興美食"買外賣，今晚整條街十分人流擠擁，幾乎有廿幾人在等候輪買外賣。在等候中不知叫什麼好的時候，剛剛輪到我了。眼見枱上放置咁多款餸料，都是照舊叫法"雜錦炒油麵"今次加底(加$8)再加豬柳(加$5) 大辣。都只不過係$43，新春期間也沒有加價，所以，價錢十分便宜👏👏👏等候期間，聞到陣陣熱辣辣又香噴噴的鑊氣味，真係十分吸引了，當場胃口大開等了大約半小時，睇到㕑房一個一個地炒過不停，十分繁忙，終於輪到我了。雖然今次等的時間比較長，但見到整盒炒麵很夠鑊氣，大大盒，餸料十足，滿歡喜帶回家慢慢品嚐

上次去過太安樓"中興美食"後，念念不忘。今晚天氣稍涼，專程坐車去這店子幫襯。今次係第二次去這店子，遠遠見到大約有八個顧客排隊，於是跟隊啦！大約等了十幾分鐘，終於到我了。今晚叫了沙嗲雜錦炒油麵加辣。今次走獅子狗和蟹柳，只是等了四五分鐘，便炒起了。香濃沙嗲香味，配上很多的餸料，包括牛肉、雞柳、紅腸、火腿、魚片及蝦腸；再伴上洋蔥及芽菜，睇見也很想即刻食了，味道濃郁，甚有鑊氣，美味無窮，價錢廉宜。下次一定要試佢哋嘅炒漢堡豬柳。

見網上好少食評....其實依間好值得試，家庭式經營，即叫即炒既雜錦河粉食肆位於太安樓近出入位置。配料一碟碟的分好：牛肉、火腿、蟹柳、獅子狗、芽菜、雞肉、紅腸；麵：河粉、銀針、粉米粉、油麵我簡左河粉，走牛肉，即叫即炒 夠晒鑊氣 埋單：$30

夜晚十點幾去咗太安樓，終於找到"中興美食" 啦！第一次去幫襯這間舖，遠遠見到一個大隻佬正在不炒嘢，於是行近些，見到即炒粉麵種類繁多，已被吸引了。但又不知怎樣選擇的情況下，我只有用最簡單的方法，叫了一個雜錦炒油麵，不要五分鐘，便炒起了。這個炒麵火氣夠熱辣辣，只是沒有其他的醬汁可選擇，但餸方面就很多及很足料；包括有獅子狗丶紅腸丶火腿丶雞肉等等。味道亦調校得相當不錯，只係唯一不及隔籬"特色雜錦炒麵"有得選擇汁料，但整體來說都係不錯的選擇，值得再來幫襯的舖頭。

港島東區美食除咗有筲箕灣東大街外，當然唔少得西灣河太安樓！今次介紹比大家嘅係抵食炒粉，料夠多，性價比高！阿張點餐👦🏻$29 《雜錦炒河》 (+$3 煎荷包蛋🍳)評分（10分滿分）：8⃣食評💬：好夠鑊氣！睇住啊叔炒啊炒，冬天食暖笠笠！麵種可以揀河粉、米粉、油麵、銀針粉或者腸粉😍雜錦嘅配料有牛肉、蟹柳、火腿、芽菜、雞肉同紅腸，我再自己加3蚊要隻荷包蛋🤤整住個蛋黃再撈勻啲河粉，一個字正！食得辣仲可以叫加辣，有乜野配料想唔要，又或者想多啲，都可以照講，好個人化👍🏼最重要係29蚊食到呢個質素算性價比高架啦！中興美食 (西灣河)筲箕灣道57- 87號太安樓商場G12C2號舖👉🏼港鐵B出口行一分鐘，大家樂旁邊入口👈🏼

7點多來到西灣河中興美食，位於太安樓近出口位置。見到員工用發泡膠盒預先裝河粉、米粉、公仔麵、腸粉、烏冬等，首先問客人要炒甚麼粉麵。然後會再問要甚麼配料，配料有差不多十款，牛肉，魚蛋，蟹柳，火腿，芽菜，紅腸及雞柳等等，有選擇困難症的人可以揀什錦做餸，就是甚麼配料都會有一些。由男師傅開爐去炒，中途師傅會問要不要辣。炒果陣已經聞到好香，不用十分鐘已經炒好。雜錦炒河粉炒得好有鑊氣，餸料入味，味道不錯，一盒已經相當飽肚。

今天早了吃晚飯，到了10時左右已覺肚餓，想起好好鑊氣的中興美食，於是便到了太安樓的中興美食炒個朱腸粉吃先。在這裡炒粉麵，有多種餸供選擇，而最方便的，可揀什錦做餸，樣樣都有些。整體來說，鑊氣夠，餸料入味，味道不錯啊！

西灣河太安樓內，食肆林立。係呢度，可以一次過食盡各式各樣的街頭美食。這夜，去了人氣店 - 中興美食，食鑊氣雜錦炒公仔麵!雜錦炒公仔麵炒料眾多，小妹要求唔要肉類，只見店主把芽菜、蟹柳、洋蔥、紅腸、火腿和獅子狗等炒料，與公仔麵放在火力十足的爐中同炒，再加入適量的豉油和調味料。瞬間，香氣撲鼻而來，叫人口水直流!旁邊放有枱椅，坐下即食，熱辣辣，香噴噴的。公仔麵炒得十分鹹香惹味，配以鮮爽富咬口的芽菜和洋蔥，再加上其他炒料，真的教人回味無窮。