十二味不只是烤魚 (已結業)

今日天氣好凍，一凍就想打吓邊爐，仲要係辣個隻，同朋友經過呢間烤魚就二話不說入咗去～舖頭係Scan QR Code 手機入單，叫嘢食都幾方便的～經典麻辣味 X 清江魚 $258｜我地叫咗中辣，個鍋其實味道是不錯的，有好多花椒八角，一上鍋嘅香辣味已經令我留曬口水。揀完鍋之後就揀魚，有四種：鯇魚、清江魚、江團魚同桂花魚（順次序咁計：最少骨到最多骨，價錢都係）。最後叫咗清江魚，估唔到又幾滑，而且無乜骨，但肉質比較腍，250蚊又無話超好食，開始覺得有小小唔抵😕😕份量而言，兩個人叫一個鍋，加3個小食都差不多。之後再叫咗幾個餸打邊爐。加拿大肥牛 $68，感覺好一般，份量又唔多；炸魚皮 $28，竟然係腍嘅！一啲都唔脆... 寬粉 $ 22，每次食火鍋都係必叫的！燒椒皮蛋 $48 |本身對皮蛋充滿期待，唔知係咪食開譚仔的皮蛋，呢個皮蛋的味道實在太奇怪，所以最後都無食曬。絕對不建議大家叫。落單係自助式，但計埋加一，都要成550幾蚊，又唔係特別好食，真係覺得唔太抵。