荷華庭園景餐廳 (已結業)

今次同Daddy去咗喺大埔林村許願樹附近嘅荷華園景餐廳食lunch.入面環境好好，有小橋流水，橋下面又有錦鯉，餐枱旁邊仲有噴水池，可以聽住流水聲用餐，成個用餐環境好舒適，不過可惜天氣唔好，所以今次我哋唯有坐室內，室內嘅彩光都好好，而且好闊落。我哋每人叫咗一個set lunch，兩個人都揀咗周打魚忌廉湯，個湯好濃郁好足料，旁邊仲配咗塊好香嘅蒜蓉包。我爹哋叫咗一個美國安格斯肉眼扒(8oz) 都幾好食，肉質好，而且話五成熟就真係做到啱啱好五成熟，出街食牛最怕就係叫五成熟，嚟到切開係八九成熟。我自己就叫咗一個串燒牛小排配薯角，啲牛小排好大舊，好香牛肉味同燒烤味，而且肉質、口感好鬆軟，裏面仲有肉汁一啲都唔會乾，仲有個脆薯角，係我食過最脆薯角，咬落去每一啖都係有爽脆嘅聲音。我哋仲叫咗一個蜜糖芥茉肉丸做小食，個蜜糖芥茉溝埋啲肉丸嘅肉汁好香好惹味。甜品係原味梳乎厘，好香蛋味，唔會太甜，非常之鬆軟。整體嚟講係非常之滿意嘅，我最鍾意食就係個牛小排同埋梳乎厘，而且呢度環境非常之好，好適合過嚟拍拖，又或者幾個朋友舒舒服服咁傾吓偈，我爹哋食到一半已經話嚟緊親戚聚會Book呢度，試吓佢哋個晚餐。