九份•十分 (河畔花園) (已結業)

台北市中心去九份十分坐完火車仲要轉巴士，而香港只係坐一程車行幾步就到沙田河畔嘅九份十分。如果你想揾刁鑽台菜，呢度未必滿足到你，但港人熟悉嘅熱門台灣美食飲品都一應俱全。先黎台灣夜市必食嘅鹽酥雞，炸得皮脆肉嫩，唔會成口油，特別之處係有六種調味粉任你試，好食又過癮。平時食嘅皮蛋多數係口水汁，但呢度就配燒汁，幾特別，豆腐幾滑，皮蛋好好食。滷水拼盤有雞翼、雞腎、雞蛋、豬腸、鴨舌、豆腐，份量足，唔韌亦唔會過鹹。餐牌有得揀牛肉麵或牛筋麵，但三寶麵除左滿足以上兩個願望之外，仲多左牛肚，三種都鍾意食，唔揀三寶就笨喇。湯底有微微藥材味同辣味，就咁飲都幾正，配埋幼麵食到雪雪聲，牛肉牛肚牛筋都好腍，夠入味。咖喱香而不辣，椰香較重，唔似用粉開，絕不馬虎，送飯一流，炸魚非常出色，脆皮咬落去勁大聲。賣想好醒目，菠蘿味幾自然，有菠蘿粒，唔會淨係得好假的糖漿，飲完精神為之一振。朋友呢杯雖然睇落冇咁浮誇，但飲落都幾清爽。