金玉滿堂

營業中

休息中

踏完單車係大圍諗緊食乜好，路經門口見到呢間餐廳個老闆娘係門口熱情介紹，所以就入去試一試。外表睇落好似只係糖水店，不過佢有埋主食同小食都幾一條龍服務。一坐低老闆娘就已經開始推介每款菜式係用咩食材整，啲食料有幾正。咁我先叫咗碗肉燥麵同兩款小食試下。咖喱魚蛋豬皮-豬皮索哂啲咖喱汁，咬落去近乎爆汁，而魚蛋食落都幾彈牙，咖喱汁亦唔算好辣。另一款小食係用花雕煮嘅雞翼尖，一上桌就聞到香噴噴嘅花雕酒味，份量都適中，一個人食到一兜。終於輪到主菜肉燥麵啦。湯同麵會分開上，唔怕浸得耐浸到啲麵淋哂。唔好以為肉燥麵剩係得肉燥，仲有一大堆乾瑤柱😃同肉燥嘅份量不相伯仲。連個湯都係雞湯，食落感受到用料十足，最正係個麵夠哂彈牙，唔會淋得仔。最後，老闆娘推介叫咗個龜苓膏。佢話佢係真係用龜板煮，唔係出面無龜嘅龜苓膏，食完就知道個分別。我試咗一啖就明啦，食落去喉嚨好舒服，無中藥個苦澀味兼且配埋個蜂蜜真係想再食多碗。所以黎呢度食野真係唔使煩，一次過食哂晚餐加甜品😂。