雲家小鍋米線 (328廣場)

營業中

休息中

荃灣向來都係米線混戰區，問過幾個成日去荃灣搵食嘅朋友，大家喺米線上都有分歧，難得呢排有機會去荃灣就試下，第一間係受 #米線關注組 關注嘅 #雲家小鍋米線 。果然去到門口就發現人龍，無論堂食、外賣都有，唔想曬住等位，所以決定外賣。網上搵資料發現店子開業四年，堅持湯底每日新鮮熬製， 需時四至六小時，而且米線每碗都係即叫即煮。配料超過40款選擇，有選擇困難症嘅朋友一定有危機，而本人恰巧就係其中一個，所以就揀咗set好嘅魚肉春卷米線。魚肉春卷米線 $37可揀麻辣或酸辣，第一次叫小辣，自己覺得唔夠候，食得辣嘅一定要叫中辣。湯底裡面有肉碎、酸菜、芽菜等等，味道有層次得嚟又唔會太膩。特登揀魚肉春卷因為坊間供應又好食嘅唔多，略嫌佢實咗少少，魚肉味都爭少少，都算合格。驟眼睇有三條但其實係切半，即係一條半。加錢叫嘅豆漿係來貨就唔特別講，整體來講係湯底好味，米線又唔會煮得過腍，呢個價錢係可以嘅，有機會再試下其他餸。