漁吉海鮮丼專門店 (已搬遷) 新店位置

九龍城一向都多野食呀啦喇，不過我地今次唔係食泰國野而係食日本魚生丼。呢間魚生丼係距離九龍城街市一兩個街口既街角，相信係相當易搵到。 呢間舖既特色就係海鮮味噌湯任添。所以係等緊魚生丼黎既時間，就可以飲住個湯等食。而且佢既味道都算正常。我地當日叫左一個海賊丼($118)，生魚丼($138)同櫻花蝦炸豆腐($38)。先講一下櫻花蝦炸豆腐，出面包左一層櫻花蝦，炸得好脆口而家唔油，唔似係翻炸。生魚丼－比目魚，三文魚，油甘魚，櫻花魷魚，蟹籽，玉子。首先個賣相已經好吸引，油甘魚，比目魚都好肥美而且好新鮮。魷魚都好唔錯（啲相無tune過相）加左青檸檬仲多個層次。基本上就啖啖都有魚生。唯一一個唔太滿意既地方就係飯唔夠軟熟，有幾啖仲要痴啱左一舊整唔開。同佢既飯量就有啲多，女仔都可能會食餘一半既飯，男仔就可能會食餘四分一。海賊丼－油甘魚，櫻花魷魚，海膽，蟹籽，玉子。（留意返張相係錯版黎，師傅多左三文魚籽）基本上就同生魚丼差唔多都係咁新鮮肥美，唯一唔同既就係個海膽。海膽就的確就係個亮點，鮮甜,creamy,香濃。而飯就同生魚丼一樣有啲唔夠軟熟。