釜之魂釜飯專門店 (淘大商場) (已結業)

好耐冇嚟過九龍灣淘大商場啦，今次去到三期，真係超級多嘢食，今次就收到邀請來試食呢間出名鰻魚飯嘅餐廳。咁佢嘅鰻魚飯最出名當然要試鰻魚飯啦，咁佢係有分高中低三個價錢，有厚切嘅鰻魚，鰻魚腩肉位置，同埋魚尾位置。咁我就試咗中間價格嘅鰻魚腩位置，佢嘅鰻魚果然真係唔錯，好香鰻魚肉味，一啲腥味都冇，入口彈牙，肥瘦均等。至於另一個就係五花豚肉釜，首先值得一讚嘅係佢嘅秘製醬汁用嚟煮五花腩真係好好味，啲肉熟嘅程度啱啱好，仲保存到五花腩肉嘅油份，加埋隻流心蛋，同埋蔥花，令到成碗飯增添唔少色彩。咁我仲跟餐，跟餐就會有麵豉湯，前菜同埋飲品，前菜係辣味嘅青瓜，麵豉湯就比較清淡，有豆腐海苔蘿蔔等等，嘢飲都係啲普通餐廳嘅嘢。