Chalet (已結業) 查看

生日月第二彈，朋友帶咗我哋荃灣一間西餐廳慶祝🥳 餐廳門面，比我有一種去咗外國小木屋食西餐嘅感覺。由於星期六晚食飯比較人多，我哋有幸可以被分配到閣樓食飯。裝修以木系為主，我哋仲可以揀去坐沙發添！餐廳set dinner都好吸引，但係我哋更加想食佢嘅Risotto 同埋Pasta🤣首先我哋叫咗一個黑松露薄片意大利飯配美國大啡菇牛肝菌泡沫。個risotto 好香好creamy, 黑松露味都好重。大啡菇都煎到啱啱好，配埋牛肝菌泡沫，令到啲菇味更加出。另外我哋都叫咗一個西班牙紅蝦意粉配柚子泡沫。意粉同樣賣相好靚，而個意粉嘅味道都好出色。意粉好濃味，用咗好多蝦肉同埋蝦膏一齊煮，但因為個柚子泡沫中和返，食落口唔會覺得好膩。另外我哋都嗌左一個芝士薯條。薯條炸得好香脆，配上面嘅濃濃嘅芝士一齊食，真係越食越上癮🤤最後當然要食個甜品啦！我哋叫咗朱古力心太軟配雲呢拿雪糕。心太軟都做到好出色，出邊個皮唔係好厚，個皮嘅外層食落口仲脆脆地，加上唔太甜, 暖暖地嘅朱古力漿一齊食，真係覺得好正🤤中間又可以食下雲呢拿雪糕，中和返朱古力嘅苦味。