兄弟工房 (已結業)

今晚自己一家人出街食飯，臨近父親節中餐實多人，所以嚟咗石門呢間西餐廳，餐廳唔算大，大約坐到20幾個人，最搞笑係咁都俾我哋撞到朋友，真係世界真細小！我地叫咗一個凱撒沙律配印第安式烤雞胸（ $88 ），兩個set dinner，包括南瓜汁煙肉意大利飯（$98 ），同埋烤澳洲羊扒配薯菜（ $208 ），晚餐仲可以加$12就有埋餐湯同飲品。凱撒沙律好好味，份量都唔少，除咗羅馬生菜，仲有車厘茄、煙肉碎，烤雞都唔少，切咗細細件，撈埋個凱撒沙律醬，感覺好清新又有少少飽肚。個意大利飯有好多南瓜汁，飯質偏軟，南瓜好入味。至於羊架，竟然有四件咁多，仲有車厘茄、沙律菜、薯仔和翠玉瓜伴碟，羊架醃得好入味，而且都夠腍，小朋友都食到。整體來講，食物質素幾好，而且招呼周到。後來見佢門口有人等位，我哋都係嗱嗱聲食完讓出位置，下次黎食都係訂定位穩陣了。