瘋狂小面 (佳德商業大廈)

營業中

休息中

今日收工後買埋外賣先返屋企，見落完雨天氣有啲凉，去左食川菜，叫左個期間限定嘅沸騰二人豐盛套餐，套餐包括沸騰鱸魚或者沸騰牛肉，同白米飯兩碗，多謝$258。我地揀左沸騰牛肉，係即叫即整，都等左四個字先有。牛肉用雙重膠袋放好，而兩兜飯、飲品同餐具就另外用個紙袋裝好，整齊企理。牛肉原來用個類似迷你盆菜兜裝好，熱辣辣，仲配埋個加熱器同加熱架俾你。服務員話扭開加熱器個蓋用火機點火邊熱住盆牛肉邊食，真係外賣都咁有風味，唔怪得叫沸騰牛肉。返到去打開，嘩，個迷你盆菜兜包裝非常高級，完全唔拍漏湯。牛肉大概有10片，非常嫩口。居然有午餐肉4塊，好邪惡。其他配料都好豐富，有大白菜、芽菜、金菇、蓮藕片、土豆片同萵筍，蓮藕片同萵筍非常爽脆，蔬菜吸左個湯，非常入味。辣度得一個，冇得揀，餐廳用新鮮辣椒紅油作為底料，加上唔同乾辣椒、花椒粒，最後用高溫滾油將辣椒爆香，食落都幾辣下。配兩份白飯用膠兜裝好。另外叫左兩罐零系可樂，每罐$12，有雪凍。餐具除左筷子匙羹，居然仲有圍裙同濕紙巾，好貼心。食完居然仲有冰粉食，好驚喜，雖然冰粉暖左，不過一樣滑溜同足料，上面有花生又有提子乾，黑白芝麻粒等等。非常飽肚既一餐。