Mimila (已結業)

一年一度新蘋果發售，朋友一早預訂左部新機係沙田新城市店攞。陪佢排左成個鐘先完成取機手續真係又餓又攰。所以近近地上左七樓揾野食。見MIMILA坐左幾位金髮外國人，就好奇入黎睇下有咩咁吸引老外都黎光顧。原來呢度主打馬來西亞麵食，尤其係各款鮮蝦製品，琳琅滿目。所以我地都唔執輸跟住老外們點返兩個呢度嘅招牌菜食返餐。三蝦撈麵。即係蝦籽／海蝦及蝦子麵嘅全蝦組合。蔥油十分香濃惹味，配上爽口彈牙嘅蝦子麵，十分討好。海蝦新鮮爽脆每隻都有滿滿嘅蝦膏，食時更多一種濃香。配上清甜蝦湯配搭，除左唔油膩之外更補充左撈麵嘅濕潤，唔會咁乾爭爭。沙沙撈魷魚翼。用上沙爹醬腌製都算香口，調配得唔會太咸辣。但可惜魷魚唔算太入味有啲可惜。馬來辣蝦湯麵(摻摻)。所謂摻摻即係兩溝米粉及油麵，雖然叫辣蝦湯但辣度唔會好嗆。反而香味同鮮味十足，兩溝麵食時口感更豐富同埋吸湯，更能品嚐蝦湯鮮味。蝦肉同樣鮮甜，食時配上芽菜／通菜健康又好味。雖然未去過馬來西亞，但週未食個地道馬來麵讓味覺遊走一轉馬來風味，都不失為一個好方法。