十常八九

營業中

休息中

依間深水埗嘅日式Cafe已經bookmark左好耐，終於有機會試到。成間Cafe只有四張枱，如果想walkin建議開店前20-30分鐘去門口排隊會比較穩陣，我早左15分鐘去到已經排緊第四張枱，真係睇緣分，緣分到左就會自然食到🤣。其實遲左少少到都唔緊要嘅，可以登記左先，然後喺深水埗影吓文青相，好快有枱會電話通知返你。黃豆黑糖豆乳🍡 $48見好多人嗌，應該係招牌飲品，黑糖豆乳豆味香濃，上面仲有一串口感煙韌嘅小丸子，打卡一流又好飲。波波青提慕斯蛋糕🍇 $58蛋糕上層鋪滿清甜嘅青提同蒟蒻，下層似係忌廉芝士蛋糕，外型十分精緻，不過味道就唔算太驚艷。蜜瓜卷蛋🍈 $68依個蛋糕一定要嗌，個人覺得超級好味，卷蛋濕潤鬆軟，蛋味香濃，完美配搭返北海道牛乳忌廉同靜岡蜜瓜肉，令蛋糕充滿蜜瓜味嘅清新，一試難忘🤤。