榮華南洋冰室

營業中

休息中

今朝要返公司，既然出咗嚟，下晝就去上環逛下，我俾呢間藍色嘅大廈吸引咗，就食個南洋午餐啦。店員推介海南雞髀飯，或者蒜炒牛柳粒飯，我特別想食一啲香口啲嘅嘢，所以揀咗蒜炒牛柳粒飯。平時食開嘅牛柳粒飯都會配薯仔，但係呢一度係配豆泡，感覺健康啲。本身牛柳粒都煮得好入味，而且仲加咗好多洋蔥、紅椒同青椒去吊味，辣辣地味道更突出。我追加咗個小食，係鳳尾蝦越式春卷，都係幾有特色㗎，外面係幾層脆皮，包住入面嘅蝦肉，再配以甜醬食，唔錯嘅選擇。咁多樣濃味，而且煎炸嘅食物，最好飲番啲凍嘢，中和一下。見佢有泰式咖啡，就叫一杯嚟試吓，點知一嚟就嚟三隻杯。原因係咖啡同埋花奶煉奶分開上，咖啡喺咖啡壺入面焗5分鐘之後（如果想濃啲咖啡味可以焗耐啲），再倒入煉奶同花奶，攪勻佢，如果想甜啲就可以攪勻得耐少少，將沈喺底嘅花奶同煉奶都融入咖啡入面。因為我係叫凍飲，所以最後嘅步驟就係將攪勻嘅咖啡，倒入放咗冰嘅杯入面令佢成為凍飲。泰式咖啡非常之好味，最好嘅係我可以自己調節自己鍾意嘅濃度同埋甜度，過程好有趣新鮮。