Story Steak & Pasta (已結業)

山長水遠入咗嚟元朗，想搵間好食啲嘅黃店幫襯下，就上網搵啦，見到呢間啲評價好似唔錯，即時打去又有位，就決定去呢度食。去到都見九成滿座，大部份都係後生仔，應該都係因為黃店所以黎支持，我哋兩男一女，女仔食唔到太多，我哋都唔叫咁多野，淨係叫咗兩個主菜，兩個小食。首先講小食，叫咗蒜蓉包同水牛雞翼，蒜蓉包佢係焗嘅，好香脆，但蒜蓉味道唔太夠亦都冇咩牛油味，至於雞翼係比想像中好，因為佢望落好乾爭爭，初頭以為佢會好乾好硬，點知食落味道唔錯之餘仲有啲肉汁喺裏面添。 主菜方面就叫咗薯蓉千層麵同埋巴馬火腿Pizza，千層麵個肉醬味道還可以，但係麵質就有啲太林身，直情有啲入口即溶嘅感覺，我個人喜好係要有返多啲彈性同埋咬口會好食啲，Pizza以為會好濃味，但係原來超淡，除咗火都有啲味之外，成個餅都冇乜味，同埋個餅底太硬了，硬到係會𠝹捐個嘴賣單時佢會送甜品係綠茶布丁，我覺得幾好食，綠茶味好濃郁，但係布丁有啲濕得滯。