Cambo ขุนทอง (The ONE)

受疫情影響，冇得去泰國，就唯有留喺香港食泰國菜思鄉一下。上次同男朋友食完，今日同🐢🍯去咗尖沙咀嘅金寶，尋找泰國嘅味道。尖沙咀呢間分店嘅裝修都幾別緻，而且菜式都好多，基本上泰國會食到嘅菜式，呢度都有，比較齊全。我哋叫咗幾個菜，第一個係泰式明爐大蜆鍋，蜆肉好新鮮，而且全部大大粒脹卜卜，加埋佢個酸辣辣嘅湯底，非常之入味。小小嘅一鍋，湯底材料非常之足夠，夠晒濃味。然後我哋又叫咗一個豬手豬脾煲，兩者都汶到好腍，豬皮下面有豐富嘅膠質，入口即溶既感覺，而且啖啖肉，完全滿足晒作為食肉獸既慾望。主食方面，我哋就叫咗最常見嘅泰式炒金邊粉。唔同嘅係，佢哋啲蝦全部係大大粒既海蝦，挑晒腸，而且好新鮮彈牙。佢哋嘅金邊粉炒得好香好入味，可能係因為佢哋啲汁落重料，所以每一啖都唔會有白灼金邊粉嘅感覺，而係每一啖都充滿甜辣味，而金邊粉加埋花生碎嘅組合，真係冇得頂！最後一道菜，係泰式炒椰菜苖，佢哋嘅原材料雖然已經長大左變咗椰菜仔，但係都不失滋味，非常香甜。最後加埋一杯青檸梳打，總算暫時可以暫時止一止我既泰國癮了。