滿屋日本料理 (已結業)

諗住係港島食日式放題，之前食咗大喜屋、碗屋，今次試下滿屋。我嚟之前都係睇咗依度嘅食評，見唔係差就試下喇。一嚟到安排座位，唔係講笑，真係俾佢嚇一跳，估唔到疫情期間仲可以坐到大髀貼大髀咁滯（sorry，我講緊係同隔離枱三九唔識七嗰啲食客），一路食一路驚。算喇，揾餐廳經營困難，完全明白嘅。好喇，講嘢食之前講下落單，今時今日仲用紙嚟落單其實真係幾懷舊，不過老實講，從左右前後嗰幾張枱急驚怒罵咁催order就知咁樣落單法，唔單止唔環保，仲會好易漏單（事實證明，我地落嘅壽司、刺身等咗成粒鐘都只係嚟咗幾款...)。如果啲嘢好食，咁等下都好應該嘅，可惜就唔係好得囉。鮑汁花膠我勸你就唔好嗌，因我有健全牙齒嘅都咬唔開，至於刺身我唔咁講，我淨係見到我隔離枱嘅小情侶成盤刺身食咗一兩件就擺咗係度，仲要食咗唔夠一個鐘就走咗，我斷估唔係好食得滯呱...去返個題目，我唔明嘅係，點解會有咁多好評，點解依間嘢仲可以咁多人幫襯，真係唔係好明。