OPPA韓國燒肉店 (已結業)

今日入咗大埔探朋友，順便食埋飯先返歸，行過見舖頭門面幾吸引，加上即刻有位，一於決定試下佢！第一次嚟呢度食嘢，舖頭環境都算幾大，好彩我哋早嚟，坐低咗唔夠3個字已經全埸爆滿，睇嚟今次無揀錯！我哋最後點咗必食推介嘅安格斯肉眼扒、牛菇同韓式海鮮湯！安格斯肉眼扒──非常大件，仲大過我隻手板！！肉質咬落非常juicy，尤其係我最鍾意食嘅肥膏部位好腍好滑，完全唔會係一咬落去就成口油嘅感覺，讚！牛菇──真係好似牛咁大舊，仲有埋舊牛油俾你一齊燒，我食咁多次韓燒真係從未試過咁食法。索咗牛油汁嘅菇菇好香，比平時就咁燒嘅惹味好多！韓式海鮮湯──好足料，睇落好似好細鍋咁，但實情我哋兩個人share每人都分到3碗！湯唔太辣，飲落有啲甜甜哋嘅奶味，好啱我口味。食飽飽埋單時，俾我發現原來呢度有我最鍾意嘅醬油蝦同醬油蟹，點解我頭先睇唔到架，下次一定要嚟試！