定食8 (已結業)

去黃大仙探完朋友，就同老公去MIKIKI行街~行行下肚餓喎，岩岩係一田隔離，見到爭鮮新開既定食店(後尾先知唔係新開^^) 就排隊試下啦~ 因為星期六關係，我排左一個鐘先有位..我見D 3,4人枱一定要人齊先入得，半數人到左都唔得…一坐低我同老公不約而同一齊嗌「豪華海景丼」^^一個SET $48，包左個飯，甜品，枝豆，蒸蛋，湯，抵到喊呀!!!白飯同湯仲可以無限加! 我先食個蒸蛋，個蛋好滑，質感係鬆鬆散散咁，入口就融，但我覺得美中不足係入面有荀…第一唔係個個都食荀啦，第二加左荀個味怪怪地。跟住到個湯，個湯係麵豉湯，但係佢唔似一般沖粉加水既麵豉湯，佢係用三文魚煲架! 所以個湯入面有好多三文魚，好好味!佢既優點係佢一D都唔腥，反而仲有甜味!!!一般我飲既都係麵豉愈多,味道會愈鹹，但係呢個唔錯! 但出面任裝既麵豉湯係無咁好飲架喎XD 我都唔明~主菜黎啦!個「豪華海景丼」正呀，可以集平時爭鮮買既刺身於一身!三文魚色水幾靚，唔算肥美，我厭佢唔夠厚身(48蚊想要幾厚身??) 劍魚味道甘甜鮮美，聞起上黎仲有一陣新鮮魚香味，放入口既時侯覺得好滑。$48黎講真係無得輸呀!下次一定會再ENCORE!