NUTTEA (海光街) (已結業)

好難得係香港見到用堅果製作既奶，配搭好創新，例如有香蕉燕麥、藜麥燕麥。重點係冇牛奶冇奶精，好健康。店鋪裝修清新簡潔，放左好多唔同種類既堅果擺設，有1、2個位可以坐住等飲品。叫左香芋堅果奶($38)，四季春堅果奶蓋茶($34)。第一啖飲，超濃榛子味，就好似食緊金莎咁。之後個口感就係超多芋頭蓉粒，芋頭打到好綿，非常足料。芋頭味一d都唔假，因為真係真材實料。叫左微糖，所以唔甜，個人覺得甜唔甜都唔會影響飲品效果，因為微糖一樣好飲。飲幾啖之後，就好有飽足感。鍾意食芋頭既人，必叫。堅果製作既奶蓋夠特別，先用小鏟子鏟起奶蓋試一試，鹹鹹既幼滑cream加埋粒粒堅果，好獨特但出奇地好飲。然後再飲奶蓋加四季春，入口先係香滑既cream，之後就係fresh既口感，鹹味cream令茶味更加突出。攪拌再用飲管飲，會有口感上既衝擊，吸到小小cream又飲到堅果味既茶。如果就咁食奶蓋，可能會覺得膩，但再飲啖茶，就解左，jeng。整體，好值得飲堅果奶，比起平時飲既既手搖/手調飲品，更健康，而家用料講究，好欣賞店舖花心思利用堅果調製奶類及茶類飲品。