金樂軒雞煲魚鍋

營業中

休息中

平時雞煲食得多啦，呢間餐廳雖然有得食雞煲，但都試咗佢嘅另一招牌菜：酸菜桂花魚鍋（1條）（小辣）（$208）。酸菜桂花魚鍋，用酸菜、辣椒、花椒、魚肉製成湯底，一開始上枱嘅時候味道會較清，感覺到係冇落味精，之後不停用電磁爐小火煮，湯底嘅味道開始會出嚟，食到最後湯底會好有鮮味！我哋叫嘅係小辣，食落本人覺得唔算太辣，食得辣嘅朋友可以挑戰更高嘅辣度，而桂花魚肉好滑嫩，整體唔錯！怕食雞煲油膩嘅朋友，可以試試。叫左鮮蝦雲吞韭菜餃雙拼（$68）、唐生菜（$33）作為火鍋配料！另外又叫咗兩個小炒：燒汁彩椒炒白鱔（$188）、尖椒炒黑豚肉（$98）。燒汁彩椒炒白鱔，一上枱已經聞到非常之香，彩椒、洋蔥、蒜頭等香味撲鼻而來，白鱔魚肉滑嫩，而且唔多骨，用燒汁彩椒一齊炒，食落去非常之惹味，鑊氣味濃，非常推薦！尖椒炒黑豚肉，亦都炒到好香，黑豚肉配搭醬汁、尖椒同洋蔥，好香口，係重口味人士之選！