九井壽司 (已結業)

聖誕假期都唔建議周圍去，主要都留係屋企，不過始終聖誕節，小朋友都想開心吓嘅，趁着「平安日」但老公又要返工，就帶埋阿女去附近食返餐開心吓啦，呢個女真係大唔透，仲好有童真咁話要去食火車壽司，所以就去咗MegaBox嘅九井壽司。呢間親子餐廳真係好到不得了，門口會有啲玩具俾小朋友自取，仲張貼咗告示教導小朋友要珍惜玩具同埋只可以攞一份，教導小朋友要自律，呢個安排已經值得讚賞！每張枱都放咗一部Pad俾食客自己落單，分類又夠清晰，非常方便。食物係用子彈火車沿着路軌送到嚟枱嘅旁邊，小朋友就覺得新奇又興奮！嚟到剛好午餐時段，所以叫咗個午餐，呢個午餐真係好抵食，有蟹子沙律、三文魚刺身三件、壽司四件、仲有一碗豬骨湯烏冬，基本上食完都已經飽咗，咁豐富都只係$68，簡直係超值！阿女就叫咗碗牛肉烏冬，牛肉份量超級多，基本上食完啲烏冬都仲有好多牛肉，都係$68有交易。另外叫咗幾款壽司，水準不俗。特別要推介呢個海苔魷魚天婦羅，其實係類似酥炸魷魚鬚，再灑上紫菜碎，點啲沙律醬，真係好好食，呢個值得推介。另外嘅墨魚咀都唔錯，份量好多，最後仲食唔晒要打包添。就係咁就食咗一餐好開心嘅聖誕大餐喇😋