風車

營業中

休息中

今日同朋友喺沙田踩完單車，嚟到朋友介紹嘅西班牙餐廳 - 風車。餐廳嘅佈置充滿格調，中間有一盞宮庭水晶燈，而且座位寬闊舒適，啱曬同三五知己過嚟食嘢傾偈。首先出場嘅係意式田園沙律配煙燻鴨胸，煙燻嘅鴨胸肉質嫩滑，配上新鮮嘅沙律菜，雖然配搭簡單，但係味道清新，口感層次多樣。之後到今晚嘅主菜波士頓龍蝦意大利粉，龍蝦嘅肉質彈牙配搭蘑菇、洋蔥同埋蘆筍等嘅食材，加上煙韌嘅意粉，味道鮮味濃郁。跟住出場嘅仲有西班牙脆皮乳豬配彩椒汁，乳豬皮脆肉滑，同平時食嘅爐燒乳豬完全唔同。脆皮乳豬既皮又脆又薄，而脆皮下軟軟嘅乳豬肉，口感豐富。碟上仲配有乳豬醬同彩椒汁，可以一次過試曬兩種唔同嘅味道，加埋伴碟嘅薯仔，好好味呀！另外，我哋仲叫咗玫瑰咖啡 ，淡淡嘅玫瑰花香同咖啡嘅味道，為晚餐畫上完美嘅句號。