新景象快餐 (已結業)

是日晚飯叫咗外賣，呢間由細食到大嘅茶餐廳最近兩年轉咗手同轉埋名，但餐牌同味道依然，廚房工作嘅班底似乎都冇乜改變。新景象嘅晚餐每日都唔同，通常有5-6款俾大家揀，奉送熱飲同中或西湯，中湯就係排骨湯，西湯就定係羅宋湯(特別推介呢度嘅羅宋湯，落足料之餘仲要好香同辣)。是日叫咗個鹹魚雞粒炒飯餐配中湯同熱朱古力。先講碗湯，一樣落足料: 紅蘿蔔、佛手瓜、南北杏、粟米同排骨通通有齊，味道幾濃幾有老火嘅味道炒飯同樣多料，鹹魚同雞粒當然唔少得，落埋蔥同蛋花令成個炒飯香好多，食落口唔太鹹，而且就算外賣都仲食得出鑊氣!整體嚟講真係好抵食，成個餐都係四十幾蚊咋，抵到爛!