日本野 (已結業)

早排係旺角食左Mini Friday，發現同層另一間餐廳叫日本野，你冇聽錯，餐廳名字直係叫日本野。我非常欣賞餐廳直接既一面，所以今日決定試一試日本野。餐廳最近做緊優惠，只要客人叫左set dinner D同H可以玩木桶大叔。第一把刀就贏既客人可以免費，第二把刀先贏都有五折。我同女友都係第八、九刀先贏，不過都有八折✌🏻 牛油果軟殼蟹卷好大份，軟殼蟹好脆口，牛油果有助中和油膩感，加埋沙律醬酸酸甜甜，非常滋味。芝士煎餃子表面勁多芝士，芝士完全融化，令餃子口感更豐富多汁。炭燒秋葵普通通通。炭燒牛舌串調味剛剛好，唔會遮蓋牛舌本身味道，肉質有韌勁。女朋友嘅dinner set係石燒吉列牛定食，肉味都算濃郁，充滿嚼勁，有少少油香。唯一要彈既係炸粉同肉容易散開。套餐亦配有溏心蛋，白飯同湯。至於我既dinner set就係和牛壽喜燒。不論油花既分布同紋路，和牛既賣相都非常吸引。自己鍾意較濃味既壽喜燒湯底，日本野既壽喜燒正正滿足到我呢一點。厚燒鰻魚玉子一共有三件，玉子燒口感比較厚實，失去滑嫩既口感，不過點埋黑松露醬就好好味。食左咁多埋單都係$750。我個人認為壽喜燒同卷物值得一試。