OPPA韓國燒肉店 (已結業)

今日細妹生日，佢話想食韓燒，所以就揀左呢間想試好耐既OPPA！一入餐廳燒肉味道好濃，抽煙就一般般啦，不過食得韓燒都預左大味。星期五夜晚黎講都唔算好多人，但座位吾算好多，都係訂位比較好。我地六個人都吾係好大食嘅人，所以都係單點算啦。叫左一個和牛拼盤（$458），估計係3-4人份量，款式多，每款份量亦唔少，牛肉新鮮牛肉味濃，點少少鹽已經好香，油脂唔會話好多好油膩。食完個大拼盤唔夠喉，再叫左一個三國和牛拼盤($268)，有澳洲、日本同美國三個地方嘅和牛，店員話每款有80克。美國嘅比較韌，日本嘅肉質比較嫩油脂最多，澳洲牛肉肉味最濃，無咁油，我地覺得澳洲嘅最正！另外仲叫左五花腩，豬大腸，魷魚，海鮮豆腐年糕湯，泡菜煎餅（$68）同海鮮煎餅（$88）。推介海鮮煎餅，足足六大塊，又厚又足料，都幾飽肚。下圖嘅泡菜煎餅好薄，無泡菜碎，得少少泡菜味，普通。值得一讚嘅係生菜非常鮮甜👍🏻，店員好樂意幫你換燒烤板，我地無燒到任何食物焦黑，款款都多汁好味！整體黎講，食物質素都唔錯，六個人（兩個細食嘅）都係一千六左右，價錢又唔貴。如果大食嘅叫放題應該更抵，絕對可以回頭再試！