芝麻開門甜品專門店

營業中

休息中

今年嘅情人節仍然禁晚市堂食，咁就唯有自己煮一個豐富嘅情人節大餐，但係食完正餐之後，總會想食啲甜品，所以唯有落街搵食，行咗一陣終於係一條內街見到哩一間甜品店。我哋俾佢門口嘅$18糖水吸引住，可惜全部都唔係我哋想食嘅😂所以最後揀咗一個朱古力味心太軟配曲奇味雪糕（哩間店舖嘅心太軟仲有抹茶味），同埋一個台式仙草凍。心太軟冇預期中要等咁耐，店員好快已經焗好，所以好快拎到返屋企食。🎈朱古力味心太軟配曲奇味雪糕一打開之後發現個份量好細，無係哩間食過堂食，唔知堂食既份量係咪都係咁😅曲奇雪糕就同普遍甜品店食到嘅味道一樣，應該都係一大盒嗰種。心太軟味道都算濃，朱古力流心同埋蛋糕嘅比例啱啱好，不過份量太少，真係食兩啖就冇曬。🎈台式仙草凍哩間嘅仙草凍有好多款配料選擇，有芒果、芋圓、紅豆、椰果、薏米、湯圓、小丸子、西米及紫米。而個汁底都有三款選擇，分別係椰汁、花奶及黑糖。今次我揀咗芋圓、小丸子及紫米，汁底就揀咗黑糖。哩間黑糖唔會話好甜，而芋頭同小丸子食落去好Q彈，煙煙韌韌，可惜個仙草唔夠滑，如果再滑啲會更好。整體來講，哩一間甜品店嘅性價比唔係好高，而且外賣份量真係太少了。