正點心 (已結業)

盆滿缽滿$78有胭脂蝦餃、鮑魚燒賣、紅菜頭餃同玫瑰包各2件。鮑魚燒賣大大粒，肉質爽滑好味，裡面有原隻鮑魚，增加咗唔少口感同鮮味。紅菜頭餃外皮爽口，裡面有冬菇、木耳、紅蘿蔔同紅菜頭，非常爽脆惹味。胭脂蝦餃外皮煙韌，原隻鮮蝦份量十足，味道都啱啱好。玫瑰包鬆軟，中間係蓮蓉餡，香甜可口。日鵝夜鵝$39個名夠晒創意，其實係黑白天鵝榴蓮酥。鵝頭係黑白二色嘅餅乾，維妙維肖。鵝身就係榴蓮酥，一上枱榴蓮香味已經撲鼻而來。食落外皮非常酥脆，裡面嘅榴蓮份量十足，香味更濃郁，軟滑香甜，鍾意食榴蓮嘅人唔可以錯過。三隻小豬$39造型非常精緻可愛嘅小豬流沙包，會令人唔捨得食。包好鬆軟，一咬開裡面鮮黃嘅流沙流晒出嚟，又香又甜。山竹陳皮牛肉球$24牛肉好嫩滑，完全唔會成口粉嘅感覺，馬蒂令口感更爽。大量嘅蔥令香味好濃，陳皮味都好出。趁熱食風味更佳。XO醬皇蒸鳳爪$26鳳爪蒸到好腍好入味，XO醬都好惹味。蜜汁叉燒腸粉$28腸粉望落油亮誘人，食落都好薄好滑，有芫荽嘅香味，叉燒豐富咗味道同口感，唔錯。