逸東軒

早排試左呢間拎過米芝蓮一星嘅酒樓，雖然假日無$38優惠，但都一早爆滿，即日book要到下午茶時間先有位。由於係酒店餐廳，裝修都幾有氣派，枱與枱之間夠晒寬闊，坐得好舒服，茶壺座內有蠟燭keep住加熱，呢點抵讚。 🍽明爐蜜汁叉燒好多人推薦呢度嘅叉燒，價錢唔平但份量幾多，舊舊厚切，半肥瘦，邊位燒到焦脆，肉質鬆化，果然名不虛傳，不過有幾舊都幾多筋。🍽春風得意脆皮腸粉腸粉皮晶瑩透薄，夾起時唔會出現甩皮甩骨嘅情況，春卷擺左一陣仲脆，包住爽口大蝦，好食。 🍽XO醬炒蘿蔔糕整法同椒鹽豆腐有d似，蘿蔔糕細細粒好易入口，略嫌XO醬唔夠味。 🍽帶子蒸燒賣豬肉燒賣加埋帶子啖啖肉，用料新鮮。 🍽鮑汁鮮竹卷個醬汁太杰，餡料偏少，呢個麻麻地。🍽黃耳上素粉果薄薄嘅外皮包住黃耳、香菇同沙葛粒，清甜爽口。🍽蜂巢海鮮芋角整芋角好考功夫，而家唔係間間酒樓都做。呢度嘅蜂巢外層炸得酥脆，芋泥餡滿滿，而且質地幼滑，唔錯。🍽蝦醬牛崧炒飯(唔記得影添）雖然蝦醬味唔太明顯，但個飯底真係做到粒粒分明，連腌尖嘅阿爸都讚不絕口。