譚仔雲南米線 (已結業)

上星期五晚, 師傅放左監就出左旺角, 最主要係幫培哥攪下寬頻, 結果當然係攪到一身大汗同埋好鬼肚餓啦, 但一支公又唔知食咩好? 兜左好耐最後師傅都係想食米線, 但素來師傅都覺得旺角冇出色嘅米線店, 就如佐敦冇出色嘅車仔麵一樣, 所以都唔知去邊間好?師傅喺冇咩選擇下加上米線大過天嘅情況低下, 唯有屈就一下, 見到呢間食店都焗住要食啦; 其實師傅最唔鍾意呢間食店嘅係食辣都要加錢, 雖然一蚊雞已經唔係咩錢, 但硬係覺得冇道理; 呢個情況就等如食雲吞麵落浙醋, 食壽司加wasabi, 所以絕對冇理由囉! 不過既然要食唯有比啦, 於是師傅柯打左牛肉, 墨魚丸同埋炸醬配酸辣湯底, 再加多杯凍檸茶!等左一陣, 酸辣米線就擺左喺師傅面前, 於是第一時間試下個酸辣湯底, 酸辣湯底係酸酸地微微辣, 幾開胃仲會追住飲, 呢下都幾過癮, 味道唔錯; 再試下牛肉, 牛肉未算好老, 但幾韌而且有根, 牛肉水準都算差, 所以唔算好味; 而墨魚丸有三粒, 入口都幾爽口, 加上墨魚丸有墨魚味, 頗香,算唔錯; 至於炸醬少少辣, 呼道尚算搶口, 不錯啦; 而配菜有腐皮芽菜, 芽菜爽口, 份量又多, 腐皮就好香, 好入味;