J POT (已結業)

一向都好喜歡打邊爐，可以話係一個”火鍋痴”，所以今日喺銅鑼灣見完過客之後，約咗三個同事食晚飯，搵到呢間用周杰倫做主題嘅火鍋店，咁啱有個同事係周杰倫嘅超級粉絲，於是大家一於去呢度試吓。一入到去就會聽到周杰倫嘅歌，好熟悉嘅感覺，環境都幾舒服。不過一間火鍋店最重要既係佢嘅食材新唔新鮮同埋個湯底好唔好味，我哋見到呢個火鍋套餐，入面有好多唔同嘅海鮮，所以我哋一於試吓睇吓好唔好味。首先就嚟嗰個龍蝦海鮮湯底，其實個湯底可以就咁倒少少出嚟飲下，超級鮮甜😍😍 呢個海鮮拼盤真係不得了，啲帶子啊鮑魚勁新鮮，配住個龍蝦海鮮湯底，帶出哂呢啲海鮮嘅鮮味。當然仲有其他肉類啦，有澳洲和牛，又有豬頸肉，亦有唔同類型嘅丸同埋餃。當然唔少得係素菜類嘅食物啦。係食完啲主菜之後，會有侍應過嚟幫你將個湯底整成泡飯，將成個火鍋嘅海鮮精華整成每人一碗好美味嘅泡飯。最後仲有兩個好好味嘅刨冰作為甜品。食完呢餐飯感覺，係佢嘅食材同埋湯底都好有令人好滿足嘅感覺，絕對推薦食呢間餐廳。