中環茶記 (已結業)

中環茶記-本土特色茶餐廳對於香港人黎講絕對唔陌生，集快餐店同餐廳於一身，提供香港特色既西式餐飲。「中環茶記」一間充滿香港特色既茶餐廳，對於喜歡懷舊既我，絕對要試下。未入餐廳，已經俾霓虹燈招牌吸引住。中環茶記絕對係非一般既茶餐廳，服務員非常有禮貌，入門既時候不斷提醒我有一級樓梯，又會主動介紹餐廳特色既食品。🐻西多士 $32西多士好厚身，外層炸到金黃色，中間仲放上大大塊牛油，未食已經覺得滿足，西多士外脆內軟，搽上糖漿同煉奶又係另一番味道。🐻沙爹牛肉菠蘿包 $34菠蘿包有我塊臉咁大個，裡面放咗滿滿既沙爹牛肉，菠蘿包面層略嫌較厚，但包非常有質感，絕對唔係空氣包。🐻煎美國牛扒拼深海魚柳 $138鐵板扒餐有三款醬汁可以選擇，包括蒜茸汁、黑椒汁同燒汁，魚柳輕微煎過兩邊，入口冇雪藏味之餘亦都唔散，至於牛扒唔韌亦有牛味。🐻咖喱雞球蔥油餅 $62「中環茶記」既咖喱真心一流，用上純椰漿加入印度香料，唔加一滴水製作，味道香濃有層次。蔥油餅同咖喱係絕配，但得三塊真心唔夠喉。🐻懷舊雪兔 $30聽個名完全聯想唔到係咩，原來係雜果賓治加上彩色棉花糖，再混合蝶豆花，成杯野好夢幻。