Sense Cafe (已結業)

【油尖旺區】【Sense Cafe】今晚係同我生命中一個好重要嘅人食飯，難得可以約到佢，我都隆重其事，返屋企換過件衫再出嚟。不過要我揀食乜都真係難，平時我唔係打邊爐就燒肉，其他嘢真係唔知頭唔知路，唔好以為我係 foodie 就好把砲至得架。佢哋嘅晚餐係配埋「精選沙律」同「餐湯」，係一個唔錯嘅蘑菇湯，濃而不鹹，幾好。我哋 share 食嘅，首先係 $145 嘅「鮮茄大蝦帶子扁意粉」，個茄醬都幾濃，另外海鮮配料都幾多，一碟裡面足足有八隻蝦，唔係講笑。另外仲叫咗 $195 嘅「露絲瑪莉羊架」，唔使審都知呢碟主力係孝敬我。佢有成四件，而且係厚肉嗰隻，絕不欺場，淨係份量呢一點已經討好到我。然後啲肉都幾好味，本身落嘅調味料都夠味，唔使點醬，當然點咗就別有滋味。嘢飲方面，我哋都加咗 $8 要特飲，分別係「熱情果果茶」同埋「牛奶朱古力」，我係飲後者嘅。首先我嗰杯係有拉花嘅，外觀一流，飲落亦都唔會話勁甜嗰隻朱古力，幾好飲。加埋一之後埋單價 $392，算係幾好嘅體驗。。。（地址：佐敦白加士街 56 號凱豪商業大廈一樓）#1amfoodie #foodie #hkfoodie #thatfoodiethin