4
1
1
打邊爐都有古祖切法? 必食8吋白鱔&激罕騸牯牛
呢間開業16年嘅老字號「煲皇」，開業以嚟都由老闆文哥坐陣，繼續保留接近消失嘅8吋手切白鱔片、乾吊片。文哥提到：「而家少咗火鍋店自家熬湯、手切鮮料喇，直接來貨始終最快。」
【必食古法配料】
手切白鱔片
足足8吋長白鱔片完全無骨，淥完唔會縮起卷埋晒，食落大大片又彈牙。「呢種切法好考刀功，因為鱔片咁薄長好易切斷，但呢種舊式切法可以切到無骨、大片，淥1分鐘度就食得，特別鮮甜。」
鹹香海味 | 乾吊片
另一款舊式火鍋配料—乾吊片，多數去老店先食到喇。因為乾吊片係海味之一，有種天然曬乾嘅獨特鹹香。滾3分鐘就食得，比普通魷魚更有嚼勁。鹹得恰到好處，又會越咬越香。好似平時食魷魚絲咁，有種食完又忍唔住想再食嘅衝動呀。
全港極少量 | 騸牯牛
騸牯牛身價矜貴，全港每日大約得10至15隻，無相熟肉商唔會拎到貨㗎。騸牯牛油花均勻分佈全身，肉質嫩啲肥啲，最重要係肉味爆濃。熟客就知寫住「手切潮汕牛」就係騸牯牛喇。呢度有3個肉位選擇—肉味濃郁牛頸脊、香腍吊龍、爽口鮮甜腩頭，價錢均一$228/細份、$408/例牌，同平時食手切肥牛差唔多價，絕對抵叫。
【每日街市拎貨】新鮮鵝腸·田雞
一見到碟鵝腸好光澤、富油脂就知係新鮮料，雪藏鵝腸完全無得比。新鮮鵝腸唔洗淥到卷埋晒，淥一陣就食得喇。入口滑嘟嘟，口感Q彈再滲出油香好正。
講真好少打邊爐見到即劏田雞，肉質更加柔軟彈牙。新鮮田雞相當甜美，感覺介乎肉、魚之間，打邊爐輕灼原汁原味。
【零味精湯底】
今次食嘅煲皇雜錦鍋，再加咗雞腳、豬肚、粟米、番茄等，多款蔬菜好清甜，又有彈牙豬肚吊味，係人人都會啱食嘅雜錦湯底。
想食得激啲，可以挑機佢哋嘅四川麻辣鍋。以出名激辣嘅印度魔鬼辣椒，再加多種香料熬煮。辣得強勁迅速，後續再滲出麻香好爽。
大圓枱坐得寬敞舒服，特設3間VIP房。
「煲皇」開到凌晨12點，想食吓宵夜都得。大堂有多張大圓枱，特設3間VIP房，多人飯局都坐得舒服。
概要
類別
港式、火鍋
熱門菜式
湯底
麻辣湯底、雞煲
條件
* 以上資料只供參考, 請與餐廳確認詳情