南小館Plus (已結業)

平時中午食開日本嘢，韓國嘢等悶悶地，今日就試食中菜，嚟咗呢間上海菜館。門口好大，可以將餐廳裡面環境一覽無遺，餐廳好光猛，用淺綠色，白色同木為主，感覺清新。30年代燻魚。味道好似豆豉鯪魚，比較咸，重口味嘅人可以試下。南國薑蓉雞，表面金黃色嘅係炸過嘅薑絲，而入面就係雞肉，肉質嫩滑，但就唔係好感受到薑味。招牌生煎包同鮮肉小籠包。上海必食菜式之二，兩款都會有鮮甜嘅湯汁流出，生煎包有兩重口感，頂層的包面口感柔軟，而底部的包皮就煎得好香脆。至於小籠包個皮薄得嚟又唔易穿，蒸得剛好。要備註下嘅係雖然嘢食唔錯，但份量比較少，變相叫多咗嘢食，以致中午每人都要百幾蚊，唔算好抵食。Kiwi決定下次想食中菜都係去飲茶果啲抵食啲。