鯛魚魚湯專門店 (已結業)

太多假期累積咗，趁住今日唔太忙，香港九龍就圍去。夜晚我就過咗鰂魚涌等埋女朋友收工，順便試下依間一直都好想去試嘅鯛魚魚湯專門店。店舖門口同裝修風格都係日式風格，環境都幾舒適。我哋各自點咗兩個主食，分別係鯛魚片魚湯湯飯、同埋吉列豬扒定食。鯛魚片魚湯湯飯會喺你面前點著一個微弱嘅火暖住個湯飯。其實個湯飯本身已經煮熟晒，所以唔使等佢滾起先食嫁，因為個火力都唔足以煲返滾個湯飯。講返個鯛魚片魚湯湯飯，鯛魚味鮮甜香濃，除咗鯛魚味，仲有一陣淡淡嘅木魚香味，非常之好味。而鯛魚片亦都有成十塊八塊，塊塊都起哂骨、淡淡肉。吉列豬扒定食、跟一份前菜、湯同白飯。湯可以選擇鯛魚濃湯、或者味增湯。咁嚟得依度食嘢，我就唔覺得有咩理由唔要鯛魚濃湯喇。鯛魚濃湯味道果然香濃鮮甜。唔知係咪有錯覺，感覺同湯飯有輕微差別，依碗鯛魚濃湯嘅味、比湯飯嘅鯛魚湯更鮮味。雖然話依度係鯛魚魚湯專門店，但吉列豬扒一啲都唔遜色，豬扒夠軟熟、炸少粉厚度算係適中，亦唔覺過乾過硬。聽講九龍城開咗分店，下次過九龍城再食先。