浪人日本料理 (已結業)

上星期五同朋友慶祝生日，朋友之前食過覺得好得，所以今次再encore，全場入座率約有8成，放題嚟講屬中價，選擇不算多，但質素好上菜快絶對值得一試。刺身約有十款，其中甜蝦及油甘魚最推介，甜蝦鮮甜大隻，而油甘魚食到魚油香，而其他如三文魚、帶子、北寄貝都OK，食得出唔係低價貨。炸物方面，脆漿做得出色，而最鍾意食炸蠔、蝦天婦羅、炸雞翼同炸芝士餅，全部上枱都熱辣辣，香脆可口。串燒方面，我極力推介燒牛舌，腍中帶爽，牛舌掌控最高境界；脆玉瓜又香又脆又多汁，唔好既我都試咗兩粒；而其他選擇有雞軟骨、雞腎、茄子、車厘茄、飯糰等等。一品料理我就推介鐵板牛柳粒，剛好7-8成熟，好腍細細粒方便食；跟住仲有黃金帶子，帶子配上沙律醬，燒到金黃色，好香口。小食方面，朋友們最鍾意蕃薯脆片同甜蕃薯，仲有蟹子沙律。甜品方面，只推介柚子味雪糕，柚子得嚟又唔會過甜。後記：如果有5-6個人，訂位時可要求坐卡位，好似有少少私人空間感。