18樓雞煲火鍋專門店

營業中

休息中

呢間雞煲火鍋店好搞笑，佢有兩間分店，都係喺18樓，所以個名就叫做18樓雞煲火鍋專門店，包你一定唔會去錯樓層！食火鍋最怕枱貼枱，有時太侷促就會成身吸晒味，而呢度環境寬敞，食得舒適。一個定價已經有齊雞煲同任食火鍋，價錢都唔貴。呢度係用QR code點選火鍋配料，另外仲有大大個雪櫃任你攞飲品同蔬菜。首先就食個雞煲，揀咗小辣，啱晒又想食辣又唔食得辣嘅我哋，雞煲醬調味做得啱啱好，帶有少少香辣非常惹味。食完雞煲，當然就輪到食火鍋啦，枱上面已經放定上湯，可以自己放湯，唔使下下舉手，真係夠晒貼心又方便。餐紙有介紹建議食法，「落2吋上湯夠哂味」！落咗上湯就搖身一變變成火鍋，雞煲裏面嘅香料繼續停留喺火鍋入面慢慢滲出，真係越食越夠味。火鍋配料相當豐富，基本上就算你揀最平嘅餐，牛肉質素亦不俗，而且亦有海鮮俾你揀，一啲都唔吝嗇。當然仲有丸類、餃類、蝦滑等，基本上款式都好齊全。食過火鍋，仲可以自製軟雪糕。 軟雪糕有兩款味道選擇，鍾意單一口味又得，扭紋風味亦得，仲有好多唔同雪糕配料俾你灑上去，包你食到肚滿腸肥。