熱點點心專門店

營業中

休息中

星期六返半日，久違地兩公婆嘆吓茶，揀咗太子地鐵站旁邊嘅呢間點心專門店。食物選擇唔少，基本上茶樓有嘅點心呢度都有，點心紙上嘅食物分類亦清晰易明。難得點心店都有燉湯飲，當然唔可以放過，蟲草花燉雞湯真材實料，湯渣非常多，入口味道鮮甜，感覺滋潤。鮮蝦腸粉加入韭黃令味道更清新，蝦仁大大粒，鮮味突出。蝦餃皇大大粒，皮薄餡靚，味道非常鮮美，煙韌嘅餃皮包住彈牙嘅蝦肉，冇得彈！鮮蝦菜苗餃亦係我嘅最愛，鮮甜彈牙嘅蝦仁加上鮮嫩嘅菜苗，比起蝦餃多一份清新。咬開透薄嘅餃皮可以見到原粒蝦仁，真材實料。北菇棉花雞亦非常出色，豬皮好入味，底部嘅麵筋亦吸收哂湯汁嘅精華。牛肉球大件夾抵食，牛肉、蔥同芫荽嘅比例啱啱好，入口亦唔會好重粉感。紫薯包口感鬆軟，紫薯餡清甜軟滑，味道唔會過甜，唔會太滯。除咗一般茶樓可以點嘅茶之外，呢度仲提供玄米茶呢個比較少見嘅選擇，茶味清新，味道淡而且唔苦澀，解膩消滯一流。近年飲茶都比較傾向呢啲新式嘅點心專門店，貪佢更加抵食，平日仲免加一，點心同樣即叫即蒸，質素唔錯，而且蝦餃燒賣之類仲可以逐件叫，最啱二人世界。見到隔離枱點咗八寶籠仔飯，香氣四溢，非常吸引，下次一定要試吓！